Flori - Press

Mire se vini ne faqen tone virtuale "Flori-Press" te moderuar nga stafi redaktues Flori Bruqi, Engjell Shehu,etj.

e hënë, gusht 21, 2006

Sa e embel sa e mire…

Nuk duhet të jesh ekspert i gjuhës shqipe për të parë se në mediat tona elektronike dhe të shkruara nuk i kushtohet kujdes i duhur përdorimit të drejtë të saj.

Në shumë raste për shkak të pakujdesisë e në disa raste edhe për shkak të mosdijes, në mjetet tona të informimit hasim përplot fjalë e shprehje në mënyrë të gabuar.

Disa drejtues të emisioneve të ndryshme në radiot e televizionet tona sa për të bërë më “kallaballëk” fjalë, e kanë bërë shprehi të thonë:
“Rikthehemi sërish në studio” – Radio Kosova, më 26.10.2003, programi për bujqësi. Fjala rikthehemi, apo sërish, njëra është e tepërt.

“Këta ishin disa nga titujt e të përditshmeve tona ditore”- Radio Dodona, 26.01.2004, ora 8.30. Fjala ditore, është e tepërt.

…të bashkëbisedojmë së bashku… Radio 21, më 2.10.2004. Programi i natës.…së bashku, është e tepërt.

Bëhen edhe gabime të natyrave të tjera si:

...kanë japur votat e tyre... -Shpesh në emisionin “Hiti i ditës”, Radio Kosova. Duhet të thuhet: Kanë dhënë, e jo kurrësesi kanë japur.

..filxhana për kafe të vjetra – Radio Drenica, dhjetor 2003. Do të duhej: Filxhana të vjetër të kafesë.

“Në kinemanë e qytetit ABC”- Radio Kosova, më 17.01.2003, ora 10,00. Duhet: Në kinemanë ABC të qytetit.

...në shkollën fillore të qytetit “Meto Bajraktari”, sot filloi mësimi... Radio Kosova, më 20.10.2003, ora 8,00.

Duhet: Në shkollën fillore “M. Bajraktari”, të qytetit...
...arsimtarët të pakënaqur me lartësinë e tyre të pagave- Radio Kosova, 26.01.2004, ora 11.00.

Këtu është fjala për lartësinë e pagave, e jo për lartësinë e tyre,( të arsimtarëve).

“Ora 8 e 21 minut” – Radio Kosova, më 24.12,2003. Duhet të thuhet 21 minuta.

“Ora 24 e 8 minuta, së bashku me ju do të jemi deri në orën 24 e 3o minuta”.

Radio Kosova, programi i natës, 7.12.2002. ( Sipas drejtuesit të emisionit, pas 30 minutash, ora do të jetë 25:00)

Ndrimi i tiketave -Star Bingo, shkruhet çdo javë në anën e sipërme të ekranit , në TV 21.

Duhet : Ndërrimi...

“Radiotelevizioni i Kosovës është në shërbim të audiencës së saj” ,

Radio Kosova, më 23.09. 2004, në emisionin “Dëshirat e dëgjuesve”.

Duhet: Në shërbim të audiencës së tij.

Druri i gjatë 6 m e 700 cm… Radio Dukagjini, më 14.10. 2004, ora 11,00. Kështu u përsërit shumëherë gjatë emisionit të kuizit.

Edhe nxënësit e fillores e dinë se 700 cm, bëjnë shtatë metra. Druri, në këtë rast në vend të 6 m e 70 cm, na del 13 m i gjatë.

Ja edhe një shembull i përkthimit keq të një filmi në KTV, nga Sudio “Tre Yje”, më 07.05. 2004, pas mesnate.

S`mund ta lëjmë...(duhet, ta lëmë) motra yte... (duhet, jote), ka mundur të është ndryshe...(ka mundur të jetë), pse se merr... (s`e), punëtorët si vrasin...(s`i), do ti vërtëtoj...(t`i vërtetojë), mi jepni...(m`i), tëne...(tënde).
Kështu është kur gjuha në vend që të mbrohet me ligj, qoroditet pa mëshirë nga kuleret e ndryshem -njerëzit që punojnë e paguhen në radiot dhe televizionet tona(RTK,RTV21,Koha vizion etj).

Për fat të keq, kështu ndodh edhe në Shqipëri edhe pse shumëkush mendon se atje flitet më mirë dhe shkruhet bukur gjuha shqipe(TV Klan;RTSH;AL SAT etj).

Flori Bruqi