Flori - Press

Mire se vini ne faqen tone virtuale "Flori-Press" te moderuar nga stafi redaktues Flori Bruqi, Engjell Shehu,etj.

e shtunë, gusht 26, 2006

Anti censura:Adem Demaci ju pergjigjet lexuesve

ANTI CENSURA

ADEM DEMAÇI:PËRGJIGJE PYETJEVE TË LEXUESVE

ARIF MALA:Zotëri Demaçi, Ju guxoni të na e thoni të vërtetën. A po kantonizohet Kosova?

A.D.- Me këtë indiferencë të thellë e tragjike QË PO TREGON PËR FATIN E VET DHE NËN KËTË HIPNOZË KRIMINALE POLITIKE që po mbahet populli ynë, mund të na ndodhë edhe KANTONIZIMI SI NJË FORMË E BUTË E COPËTIMIT TË KOSOVËS. Por ka edhe më keq se sa kantonizimi. Regjimi çetniko-neofashist i Beogradit është pikërisht duke na e përgatitur atë të keqe më të madhe. Qëllimi i regjimit të Beogradit është që të krijohen sa më shumë komuna të pastra serbe, ose me shumicë serbe dhe kjo, falë vazalëve e qyqarëve tanë të instaluar në intitucionet formale të Kosovës të cilët luajnë sipas urdhërave që vijnë nga lart, dalngadalë edhe po realizohet. Beogradi kërkon TETËMBËDHJETË KOMUNA SERBE dhe si po zhvillohen punët do t’i “nxjerrin” TETË. Kaq komuna ndërkombëtarisht të njohura, kanë për t’u mjaftuar kriminelëve serbë të Beogradit që ta “tollovisin” tërë Kosovën. Ata do të na mbajnë nën trysni permanente krimesh e kundërkrimesh derisa të mërziten Evropa e Amerika dhe krejt në fund, si zgjidhje “solomonike”, regjimi serb do të organizojë një “referendum” në “SRPSKA ZAJEDNICA KOSOVA I METOHIJE” ( BASHKËSIA SERBE E KOSOVËS DHE E DUKAGJINIT) DHE KËTO TOKA DO T’IA BASHKANGJESË SERBISË SË MADHE! Nëse dikush prej nesh mendon se regjimi serb po tallet dhe se do të tallet e ka gabim!

SHABAN MEHMETI: Zotëri Demaçi, Ju lutem na thoni si e shihni veprimin politik të BDI-së në Maqedoni dhe në përgjithësi si e konsideroni situatën në Maqedoni?

A.D.- Zotëri i nderuar, nuk do të thotë se nga Kosova, ndonëse kemi vetëm një “mur midis nesh”, mund të shohim krejt çfarë është e çfarë nuk është e vërtetë në Maqedoni. Sipas njoftimeve të fundit që kam përçarjet shqiptare edhe në Maqedoni, sikundër kudo tjetër në hapësirën shqiptare, janë duke na kushtuar fort shtrenjtë. Zotëri Gruevski, mandatari për të krijuar qeverinë e Maqedonisë, pasi që u bind cok se partitë shqiptare atje më shumë e dashkan pushtetin sesa interesat e popullit të vet, BDI-së dhe PPD-së ua dha mundësinë që në mënyrë demokratike të “kujdesen” për bllokimin e rrugëve, kurse PDSH-së, si “nagradë”, për lojalitet ia hodhi nja katër “sheqerka”, nja katër ministri nga ato më të parëndësishmet e kabinetit të tij! Por, le ta lëmë ironinë e talljen. Tash është fare e qartë se si “shpërblehen” në politikë egoizmat e përçarjet tona. Le të mendojmë se si do të dukej pozita dhe faktorizimi politik i shqiptarëve në Maqedoni po të ishin të bashkuar në një parti, ose në një bllok të përbashkët politik para zgjedhjeve a pas zgjedhjeve. Do të ishin fuqi e tretë politike në Maqedoni. Do të ishin të fortë dhe tërheqës për çdo kabinet qeveritar, por do të ishin të fortë edhe në opozitë. Nga njëqind rrugë e veprime të mundëshme kjo që po bën sot BDI-ja, me protesta për t’u përfshirë në kabinet, është veprimi më i gabuar. Kjo është rruga që çon në një zhvlerësim të vetëvetes dhe është një rrëshqitje në drejtim të “akullit të hollë” në sipërfaqen e lojës politike dhe në sytë e opinionit politik botëror. Ky opinion politik botëror është duke përcjellur me “mikroskop elektronik” çdo lëvizje politike në Maqedoni. Kjo që po bën sot BDI-ja shkon në favor të plotë të politikës maqedonomadhe të z. Gruevski. Përse? Sepse shkaku nismëtar për këto protesta, anipse paqësore, është absurd. Nuk mund të hyni me dhunë në një kabinet nëse mandatari që ka fituar shumicën nuk ju do. Askush në botë nuk ka për t’i marrë parasysh argumentet tona. Rregullat parlamentare janë të këtilla dhe këto nuk mund të ndërrohen sipas qejfit tonë: “kur jam në shumicë i përfill e i pranoj këto rregulla, por kur mbetem pakicë këto rregulla nuk i përfill dhe nuk i pranoj”! Nëse ndodhë që demontstratat e protestat tuaja të eskalojnë në çfarëdo mënyre, opinioni botëror do të fajsojë BDI-në. Qëllimi i maqedonomëdhenjve ishte që forcat politike shqiptare të përçaheshin. Falë ambicjeve personale të liderëve shqiptarë dhe interesave grupore kjo u arrit pa vështirësi. Mirëpo tash qëllimi i maqedonomëdhenjve është që një nga një të izolojnë dhe të çthurin forcat politike shqiptare. Qëllimi është që, në fillim, BDI-në ta izolojnë si brenda si jashtë, pastaj PDSH-në ta urtësojnë, ta nënshtrojnë e në fund ta gllabërojnë fare. Shikoni ju se çfarë ministrishë u janë besuar shqiptarëve! Shëndetësia, Arsimi, Kultura dhe Ekologjia. Asnjë ministri që ka peshë dhe që mban themelet e shtetit nuk i është besuar shqiptarëve! Mos vallë, kjo është rastësi? Aspak! Lidhur me këto ngjarje, këtu, në Kosovë, u dëgjuan disa zëra sikur Arbën Xhaferi ka dhënë ose po përgatitet që të japë dorëheqje nga posti i kryetarit të PDSH-së. Nëse kjo ka ndodhur ose do të ndodhë, kjo nuk do të mund të “paketohet” nën arsyetimin e shkaqeve shëndetësore. Arbën Xhaferi nuk ka kohë për t’u koritur. Ai nuk do të dojë që të bëhet pjesëtar i një mashtrimi e poshtërimi politik nga ana e z. Gruevskit. Nëse do të ndodhte që PDSH-ja të tërhiqej nga koalicioni me VMRO-në, për çfarë si po duket ka pak gjasa, ATËHERË KRIZA POLITIKE DO TË MERRTE NJË KAHJE QË DO TË TEJKALONTE KAPACITETIN E VMRO-së DHE TË Z. GRUEVSKIT PËR TË MENAXHUAR ME SITUATËN DHE ME MAQEDONINË. ATËHERË DO TË SHPËTOHEJ NGA SHTYRJET E PAFUND EDHE “MARRËVESHJA E OHRIT” DHE BOTA NUK DO TË MBETEJ APRIORI ME MAQEDONOMËDHEJNT. Vallë, a do të kenë shqiptarët në Maqedoni kapacitet politik për të faktorizur vetëveten? Por, që të mos u mbetet hatri vëllezërve të mi në Maqedoni, mund ta zgjeroj pyetjen edhe më tej. Vallë, a do të kenë të gjithë shqiptarët, kudo që janë, kapacitet politik për të faktorizuar vetëveten?

XHEMAIL LALA: Si e komentoni kumtesën e fundit të Grupit të Kontaktit lidhur me Kosovën dhe veriun e Kosovës?

A.D.- Kumtesat e GK, njëra pas tjetrës, pakngapak, dalngadalë janë duke zbuluar e duke zbardhur KONTURAT e rezolutës së ardhme të KS lidhur me statusin politik të Kosovës. Kjo ëahtë një mënyrë e përgatitjes të opinionit të palëve në konflikt. Këtë radhë kumtesa e GK ka pasë për qëllim të bëjë një trysni subtile në palën kosovare dhe të njoftojë, ashtu nga larg, opinionin tonë se në çfarë drejtimi janë duke u zhvilluar gjërat. Për ata që marrin vesh nga “temsili” mund të kuptojnë se fati i tokave të Kosovës në veri të Ibardhit po vendoset ashtu si po kërkojnë hegjemonistët e Beogradit. GK si mekanizëm i zgjatur i Këshillit të Sigurimit të Organizatës së Kombeve të Bashkuara është duke kryer punën e vet me mjeshtri të madhe. Grupi i Kontaktit po mundohet që të “sheshojë” terrenin midis kërkesave të hegjemonistëve të Beogradit dhe të “mbrojtësve” të interesave të Kosovës. GK po i shtynë herë palën serbe – formalisht, herë palën kosovare -objektivisht që t’i bëjnë lëshime njëra tjetrës dhe të afrojnë qëndrimet sipas kërkesave të konkluzave të Konferencës së Helsinkit esenca e të cilave është se “nuk ka ndryshim të kufijve pa pajtimin e të dyja palëve”! Mirëpo, derisa pala e Beogradit nuk lëshon fare pe, por vetëm sa rritë çdo takim kërkesat e veta, pala e Prishtinës, në çdo takim, han fjalët e veta, tërhiqet dhe lëshon pe nga “frika se mos po këputet peri i bisedimeve”! Ju lutem, lexojeni me kujdes vetëm një pjesë të vogël nga kumtesa e GK sipas agjencisë “Lajme.Net”...”Grupi i Kontaktit vlerëson se decentralizimi i qeverisjes lokale mund t’i ndihmojë komunitetet në veri të Kosovës që ta ruajnë identitetin e tyre dhe të mbrojnë të drejtat e tyre dhe njëkohësisht kjo do të LEHTËSONTE NDIHMËN E OFRUAR NË MËNYRË TRANSPARENTE NGA BEOGRADI PËR TË ARRITUR NJË AUTONOMI MË TË GJERË QË T’IU PËRGJIGJET NEVOJAVE SPECIFIKE TË QYTETARËVE TË VET. Kush është “Bektesh” nuk e ka vështirë që ta marrë vesh këtë qëllim të thënë në mënyrë KREJT TRANSPARENTE të Grupit të Kontaktit. Edhe një herë, o lexuesi im i nderuar, përcilleni çdo fjalë: BEOGRADI DO TË KETË TË DREJTË QË NË MËNYRË TË PAPENGUAR DHE ASHIQARE TË NDIHMOJË PLOTËSIMIN E NEVOJAVE SPECIFIKE TË QYTETARËVE TË VET.(Dmth. të atyre qytetarëve në veri të Ibardhit pjesë e cila objektivisht do të shkëputet nga territori i Kosovës sepse ata qytetarë atje janë qytetarë të vet, dmth, qytetarë të Serbisë!) Sepse, nëse janë qytetarë të vet edhe toka ku ata banojnë do të jetë e Serbisë. dhe këta mjeranat e Kosovës, i ashtuquajturi Grupi i unitetit, i gatshëm për të falur tokat e Kosovës, siç e dini e mirëpriti këtë kumtesë të GK! Po të njëjtën kumtesë, jo për çudi, e priti dhe e tumiri edhe pala e serbëve të Kosovës! Dhe, pse jo? Këta, për më tepër, na thonë hapur se ata nuk janë pakicë në Kosovë! 5% - shi qenka shumicë, kurse 90% - shi na qenka pakicë! Ec e mos plas! O, sa lakmi po ua kam atyre që u vranë e nuk e pritën këtë kohë si unë që ta mësojnë këtë “matematikë”të korruptuar!

ZENEPE LUKA, (Vlorë): Si do t’i gjykonte Demaçi bisedimet në Vienë për çështjen e Kosovës? Shikoni dritën jeshile për pavarësinë e Kosovës?

A.D.- Zonjë e nderuar, falë Ligjit të pandalshëm të jetës, ne jemi në rrugëtim drejt lirisë. Mirëpo në rrugën tonë të pandalshme drejt lirisë ka ndodhur dhe po ndodhë një dukuri e çuditshme sikur ajo e shkëmbit të madh maje maleve që rrokulliset tatpjetë drejt fushës pjellore, por që gjatë rrokullisjeve i shkoqen copat sa majtas, sa djathtas. Sa herë që dikush nga fqinjët tanë u pavarësua mori me vete nga një copë të trungut tonë! Kështu ndodhi me ne pas pavarësimit të Malit të Zi nga sundimi otoman, pas pavarësimit të Greqisë, pas pavarësimit të Serbisë. Kur u pavarësua Shqipëria më 1912-tën kjo humbi 60% të territoreve dhe të banorëve të vet! Ngjashëm po ndodhë edhe TASH gjatë pavarësimit të Kosovës. Një pjesë të tokës së Kosovës, te Debelldeja, me ndihmën e Serbisë dhe të faktorëve ndërkombëtarë, na e mori Maqedonia. Tash, sipas kumtesës së fundit të Grupit të Kontaktit, nën firmën e decentralizimit “shpëtimtar”, po përgatitet edhe cungimi faktik i pjesës veriore mbi lumin Ibardhë të Kosovës. Takimet e Vienës janë vetëm vendi ku shihen dhe ku dëgjojnë palët njëra tjetrën, por bisedimet e vërteta bëhen prapa perdeve dhe me mjete e mekanizma tjera. Për shembull takimet me Grupin e Kontaktit janë format dhe mënyrat më vendimtare ku arrihen ndikimet efektive. Mirëpo, paraprakisht ishin grupet selekcionuese të ndërkombëtarëve të cilët kanë përzgjedhur me kohë personat me të cilët, kur të vinte koha dhe nëse do të tregohej e nevojshme, do të futeshin ose do të shtyheshin në ekipet përkatëse. Faktorët ndërkombëtarë kanë përvojë të madhe për këto punë e këto veprime. Prandaj ka pak gjëra që i lehen rastit. Ndërkombëtarët kanë probleme me Serbinë se atje nuk arritën që të finalizonin, të selekcionin e përzgjidhnin personat me të cilët ata dëshironin e dëshirojnë që të kryejnë punë. Në fazën e pushtetit të Zoran Gjingjiqit, Ndërkombëtarët kanë qenë shumë afër që të instalonin këtë “teknikë”, mirëpo “Cërna Ruka” me gjak e pengoi këtë qëllim. Prandaj, në vendse të ndodhte e kundërta, Serbia po shantazhon Perëndimin dhe po nxjerr përfitime për veten e vet në kurriz të Kosovës. Perëndimi nuk po fshehë dëshirën e qëllimin e vet që edhe Serbinë ta përfshijë në Bashkimin Evropian. Nga andej po dëgjohen zëra se Serbia duhet të përcaktohet për Bashkimin Evropian ose për Kosovën. Këtyre zërave si kërcënues, Koshtunica ua përplasi përgjegjen se NE NUK E JAPIM KOSOVËN SI ÇMIM PËR TË HYRË NË BASHKIMIN EVROPIAN! Nëse dikush në Eropë nuk ka qenë i sigurt se z. Koshtunica është ÇETNIK E SHKUAR ÇETNIKUT, tani e ka përgjigjen e tij të saktë dhe pa lakesa.
Drita jeshile për një pavarësi, që thoni Ju, po shihet, mirëpo shtrohet pyetja e MADHE:ÇFARË DO TË JETË AJO PAVARËSI? Pavarësi e kushtëzuar? Pavarësi e kontrolluar? Pavarësi e mbikëqyrur? PAVARËSI PA SOVRANITET?! Apo një pavarësi invalide që do ta bëjë Kosovën një XHYNAHE TË EVROPËS?!






ADEM DEMAÇI: PËRGJIGJE PYETJEVE TË LEXUESVE


AZEM BERISHA: Çka mendoni lidhur me incidentin që ndodhi më 15 korrik në hyrjen nr.1 të kufirit verior me Serbinë, në Albanik? Kryetari i Asamblesë komunale të Albanikut (Leposaviq), nga policia e SHPK-së është ndaluar për një kontroll të rëndomtë rutinesk, mirëpo kryetari në fjalë, që kishte me vete dhe gruan me dy fëmijë, ka kundërshtuar duke u sjellur fort keq e madje ka nxjerrë edhe revolen. Pas ndaljes dhe marrjes në pyetje, megjithatë, është liruar, pa kurrëfarë dënimi...
A.D.- Z. Kryeministri, Agim Çeku, pas 15 korrikut pati bërë një vizitë në pjesën veriore të Mitrovicës, mirëpo atje sigurimcat e Serbisë nuk ia patën varur fort. Dihet se z.Kryeministër pati kërkuar nga KFOR-i që të merrte masa e të mos lejonte që kufiri midis Kosovës e Serbisë të mbetej kështu “sallamadi” si deri më tash. Unë nuk kam lajme nëse z. Kryeministri ka guxuar që ta vizitonte z. kryetarin e Albanikut dhe të kërkonte, JO SE JO, llogari, por të paktën SQARIME për sjelljen e tij prej huligani. Ju, duhet ta dini, siç kanë bërë të ditur mediat tona, ato katër komunat në veri të “Kosovës”, Leposaviqi, Zubin Potoku, Zveçani e pjesa veriore e Mitrovicës, ka kohë që njohin vetëm Serbinë si shtet të vetin, kurse refuzojnë të njohin Qeverinë e Kosovës. Por unë, me këtë rast pyes veten, përse ata “sllobodanat” e veriut kanë për të njohur një qeveri në kafaz?

NEBIH ADEMI: Si i vlerësoni Ju këto censurime të tmerrshme që ju bëhen Juve, disa figurave kombëtare dhe vetë të vërtetës objektive? Me rastin e protestave të 24 korrikut të VETËVENDOSJES, të disa organizatave të dala nga krahu i Luftës Çlirimtare dhe të disa deputetëve të Kosovës, përkundër vapës përcëlluese ( 30 shkallë Celsius!) dhe përkundër pushimeve verore, ishin të pranishëm mbi 1000 veta. Të tri programet tona televizive, sidhe gazeta e Batonit “Ekspress” dhe “Koha Ditore”, të cilat shtiren si të pavarura, dezinformuan keqas shikuesit e lexuesit e vet duke thënë se ishin vetëm 200 veta! A mos vallë në këto mediume punojnë UDB-ashë, titistë, rankoviçistë, apo djemtë e nipërit e tyre? Sepse ndryshe nuk po e kuptoj këtë censurë të hatashme...

A.D.- Zotëri Nebih, më falni, por jeni gabim kur i krahasoni këta hyzmeçarë të sotëm me ata hyzmeçarët e kohës kur në këto hapësira të gjithë pushtetin e kishte UDB-ja famëkeqe. Atëherë për mosbindje regjimit gjakatar të shkonte koka, ose e haje burgun. Kurse, këta hyzmeçarët e sotëm po shesin ndërgjegjen e vet njerëzore, kombëtare e profesionale për para dhe për ca poste të shkreta. Por, mos u habitni, kjo është KOHA KALIMTARE e vlerave të rreme, e njerëzve të rremë, e patriotëve të rremë, e gazetarëve të rremë, e shkrimtarëve të rremë dhe e liderëve të rremë. Megjithkëtë, mos u dëshpëroni sepse kjo fazë, me vlera të rreme në sipërfaqe, ka për të qenë shkollë e vërtetë për popullin tonë me energji e vitalitet të hatashëm, por me dije të kufizuar e me vetëdije ende të fjetur.

ZENEPE LUKA(Vlorë): Cili do të ishte komenti i Adem Demaçit për situatën politike në Shqipëri pas incidentit të fundit në Parlamentin shqiptar dhe çfarë është pasoja që vjen për Kosovën? Një këshillë e Mandelës shqiptare për të kapërcyer krizën?

A.D.- Fort e nderuara zonja Zenepe! Ne Shqipërinë e duam dhe e përjetojmë si një tërësi të pandarë në krahina, në fe e në parti. Mirëpo kur ndonjëherë dalin në sipërfaqe ndarje të këtilla ne dëshpërohemi fort. Edhe këto që pamë para disa ditësh në Kuvendin e Shqipërisë na pikëlluan e na dëshpëruan. Ne, gatise jemi mësuar, prej vitesh që të shohim skena të padenja në Kuvendin e Shqipërisë, mirëpo kjo e fundit ishte tepër e “fortë”. Ne përkrahim me gjithë zemër përpjekjet z. Kryeminiatër Sali Berisha dhe të Qeverisë së tij që të pastrojë Shqipërinë nga mafia dhe krimi i organizuar, sepse të njëjtin hall kemi edhe ne këtu në Kosovë, mirëpo nuk e kuptojmë sa duhet rezistencën e fortë në të cilën ka hasë kjo politikë nga ana e opozitës ose nga ana e opozitës së bashkuar. Si duket edhe atje, në Shqipëri, sikundër këtu në Kosovë, mafia e kriminaliteti i organizuar kanë lëshuar rrënjët në vetë Kuvendin e Shqipërisë, përkatësisht në Kuvendin në saksi të Kosovës. Mirëpo, derisa mbi Kuvendin në saksi të Kosovës qëndron administrata ndërkombëtare e cila nuk lejon që gjërat të arrijnë PIKËN E VLIMIT, atje në Shqipëri, lufta e tërbuar për pushtet, pikërisht aty ku nuk duhet, po i ngritë tensionet deri në pikën e vlimit e të turpit. Sa për ndonjë këshillë që thoni Ju, nuk ka nevojë sepse të gjithë ata deputetë dhe këta “deputetë” nuk kanë nevojë sepse që të gjithë janë të zgjuar, mirëpo që të gjithë janë kapur pas interesave individuale të cilat janë më të forta se çfarëdo këshillash. Por, mos u dëshpëroni sepse me kohë populli ynë, këndej e andej Bjeshkëve të Nemuna, do të mbushet mend dhe NUK DO T’UA FALË BESIMIN ATYRE QË INTERESAT E TYRE VEHTIAKE I VËNË MBI E PËRPARA INTERESAVE TË PËRGJITHSHME KOMBËTARE E NJERËZORE.

SHEMSIE BEKA: Ju lutem, kam dëshirë të dëgjoj edhe komentin Tuaj lidhur me kërcënimet e nënkryetarit të PARTISË RADIKALE SERBE, Tomisllav Nikoliq. Ai tha përafërsisht se për Kosovën Serbia duhet të luftojë nëse bashkësia Ndërkombëtare ia njeh pavarësinë! A është ky njeri tamam me mendët e kresë?

A.D.- Ai njeri është tamam me mend aq sa ishte Milloshrviqi. Mirëpo, nuk ishte vetëm Millosheviqi ai që bëri mizoritë e gjakderdhjet e pafalshme mbi popujt e qytetarët e pafajshëm. Me të e prapa tij ishin të paktën një milion njerëz që jetonin e bënin pallë mbi kurrizin e dhjetëra milionë të tjerëve. Shesheli e Nikoliqi, me partinë e tyre Radikale ishin të rreshtuar menjëherë pas Millosheviqit. Pastaj vinin Drashkoviqi, Arkani e Dragani, Frenki e Legija me çetnikët e vet, vinte Koshtunica me simpatizantët e vet, vinte Pavli e Artemija me kortezhin e vet; vinin shërbimet sekrete të të gjitha llojeve, vinte inteligjencja e rreme e Serbisë, vinin garniturat udhëheqëse të administratës shtetërore, garniturat udhëheqëse të kapaciteteve shtetërore prodhuese, tregëtare, bankiere, garniturat udhëqëse të sistemit të (ç)edukimit, të (ç)kulturës, të (dez)informimit e krejt në fund vinin armata e policia. I gjithë ky kallaballëk i larëm njerëzish dhe të gjitha strukturat e “paketuara” prej tyre, përkundër pjesëmarrjes së tyre aktive në gjakderdhjet e tmerrshme që shkaktuan githandej ish-Jugosllavisë, me pak përjashitme, mbetën të paprekura dhe po funksionojnë aktivisht brenda sitemit shtetëror të regjimit të Beogradit. Tomisllav Nikoliqi është vetëm një zëdhënës joformal i këtij kallaballëku të larëm. Nëse keni përcjellur paksa me vëmendje reagimin e elitës së regjimit serb, nuk e keni pasur të vështirë të vëreni se me çfarë butësie, me çfarë mefshtësie, me çfarë delikatese iu kundërvunë fjalëve të tij luftënxitëse, vetëm disa individë e disa media. Disa faktorë të rëndësishëm nga bashkësia ndërkombëtare ende janë duke “përkëdhelur” Serbinë çetnike e neofashiste. Regjimi serb ende nuk e ka marrë përgjigen e meritur nga bashkësia ndërkombëtare për krimet e veta monstruoze. Kujtoni çfarë ndodhi në Srebrenicë. Forcat e NATO-s që kishin marrë përsipër mbrojtjen e Srebrenicës u stepën para brigadave të udhëhequra nga gjenerali Mlladiq dhe lanë popullatën e gjorë në mëshirën e bishave çetnike. 13.500 fëmijë, gra e pleq u faruan në mënyrën më mizore! Nuk mendoj se Nikoliqi është vetëm dhe nuk mendoj se kërcënimin e tij duhet marrë me përçmim. Nuk mendoj se Serbinë duhet nënçmuar as sot, as kurrë.

YMRANE DUKAGJINI: Zotëri Adem, Koshtunica tha se për asgjë, madje as për aderimin në Bashkimin Evropian Serbia nuk është e gatshme që të heqë dorë nga Kosova. Çfarë thoni Ju për këtë?

A.D.- Në Serbi ende është aktive “Cërna Ruka”. Ivan Stamboliqi dhe Zoran Gjingjiqi humbën kokat pikërisht sepse ishin të gatshëm që të pajtoheshin me realitetin dhe të shpëtonin popullin serb nga iluzionet e mitet e veta mesjetare. “Cërna Ruka” i ka rrënjët e rrembat e vetë në qarqet e korit të oficerëve të Serbisë, në qarqet e Sigurimit shtetëror, në qarqet e Akademisë së Shkencave e të Arteve, në qarqet udhëheqëse të Kishës Ortodokse dhe në qarqet e Masonerisë ndërkombëtare. Ne, mund të mendojmë çfarë të duam, por Serbia ende ka mbetur burim krizash dhe aventurash politike e kriminale.

SAMI SYLA: Letra e Kryesisë së LDK-së dërguar Agim Çekut, nga mediat tona u shndërrua në “furtunë në tenxhere”! A nuk përtoni që ta komentoni edhe Ju, në mënyrën Tuaj, këtë “mesele”?

A.D.- Me të vërtetë si thoni Ju, ajo letër u bë “mesele”! Para së gjithash, shtrohet pyetja, përse ka pasur nevojë që ajo letër të bëhej publike? Kujt i është dashur një gjë e tillë? Z. Agim Çeku sigurisht që nuk ka pasur nevojë për një letër të tillë. Çdo parti, nëse është parti dhe nëse mendon që të ruaj kredibilitetin para opinionit dhe zgjedhësve të vet e ka obligim që të shikojë se si sillen, si punojnë dhe çfarë rezultatesh tregojnë në postet e tyre ministrat që vijnë nga radhët e saj. Kjo do të ishte dhe është krejt normale, mirëpo të bëhet publike dhe madje të tregohet se cili person është i autorizuar nga PARTIA QË TË BËJË NJË PUNË TË KËTILLË, KJO NUK ËSHTË NORMALE. LDK-ja me këtë gjest, dikujt, ose disave ua dërgoi një mesazh, një selam, apo paralajmërim. Z. AGIM VUNIQI, po shkruan gjërë e gjatë se si LDK-ja, duke vepruar në këtë mënyrë, po e hedh poshtë dhe po e shkelë sistemin parlamentar duke injoruar mandatarin, kryeministrin Çeku, për të formuar e drejtuar qeverinë siç e kërkon sistemi demokratik e parlamentar. Kjo është e vërtetë, mirëpo, z. Vuniqi, nuk po e ka parasysh faktin se LDK-në ende po e kontrollon mafia e brendshme partiake e cila, duke nuhatur rrezikun e humbjes së pushtetit e me qëllim që të rrisë AUTORITETIN E VET E NË MËNYRË QË TË QËNDROJË EDHE MË TUTJE NË PUSHTET është duke bërë veprime tepër nervoze. Me këtë mënyrë, ka mundësi që “elefandët e moçëm” ua kanë bërë me dije anëtarëve të vet që përderisa ata t’i binden “rendit” të vet ata do të jenë të mbrojtur dhe të sigurt. Prandaj ata duhet ta kenë të qartë se prej kujt janë dhe do të jenë të mbikëqyrur dhe se kujt i japin dhe se do t’i japin llogari. Ndoshta LDK-ja, nën peshën e dosjeve të grumbulluara e të vala të UNMIK-ut, ka marrë sinjal nga instancat ndërkombëtare që të bëjë disa “pastrime” e “lëvizje” në institucionet kalimtare të Kosovës prandaj, për të “ruajtur poenat për vete”, del në “mejdan” si forcë që mban situatën në dorë dhe vepron. Ndoshta “elefandët” e moçëm duan të na e bëjnë me dije SE ATA JANË KËTU E JO AGIM ÇEKU! Këto janë finesa politike, por LDK-ja falë finesave edhe ka mbijetuar deri më tash në skenën politike të Kosovës.

BEKIM REXHEPI:Zotëri Demaçi, si e komentoni argëtimin politik të shqiptarëve me vetëdijen e ulët që po tregohet NDAJ ANTINOMISË SË TESTIMEVE ndërkombëtare?

A.D.- Dija e kufizuar dhe VETËDIJA E FJETUR E POPULLIT TONË NA BËJNË FORT TË PËRSHTATSHËM PËR TESTIME E EKSPERIMENTIME ndërkombëtare.




Letra pa ngjyrë dhe pa shije

Paraprakisht kjo letër nën tryezë është puç institucional, ngase zhvelërsohet krejtësisht institucionalizmi parlamentar dhe instalohet centralizmi dhe dogmatizmi në politikë ku vendimi politik është mbi rregullativën parlamentare dhe nuk është aspak në pajtueshmëri me teorinë e demokracisë.

Agim Vuniqi

Një letër “paramilitare” e dërguar nga kryesisa e LDK-së, nën tryezë (e nënshkruar nga nënkryetari i kryesisë z. Kryeziu), e adresuar për kryeministrin Çeku, tregon jo-seriozitetin e pushtetit kosovar, mu në fazën vendimtare të zgjidhjes së statusit final të Kosovës. Se sa janë energjik ideologët partiak të LDK-së, dëshmon për këtë rebelimi institucional, i një kryesie të tërë. Ky jo seriozitet është për çdo kritikë, me këtë akt është godtur rëndë institucioni legjislativ, është eleminuar politikisht parlamenti shumëpartiak i Kosovës, në të cilin ka bazën e përfaqësimit kryetari i Kosoves dhe mandatari i qeverisë, dhe atë në bazë të marrëveshjes për koalicion në mes të LDK-së dhe AAK-së, e zyrtarizuar përmes procedurës votuese nga parlamentarët. Si duket për “paramilitarët” partiakë (nuk është mbajtur asnjë mbledhje me këshillin qendror, edhepse kjo ishte e domosdoshme, vdekja e kryetarit të LDK-së dhe eliminimi politik i z, Dacit, përndryshe i zgjedhur kryetar i kuvendit të Kosovës, që në përbërjen e parë) nuk kanë farë rëndësie zgjedhjet nacionale, ku u verifikuan mandatet e parlamentarëve të cilët votuan kryeministrin dhe ministrat, ndarja e ministrave u bë në bazë të ujdisë për koalicion. Ashtu si veprojë kryesia e LDK-së, fatkeqësisht i hap rrugën e rebelimit edhe të ministrave serb në qeverinë e Kosovës, që mund të qojë edhe në krizë parlamentare, pra serbët të mos e pranojnë kryeministrin Çeku si mandatar dhe të provojnë t’i bashkangjiten qeverisë serbe dhe kryeministrit Koshtunica. Paraprakisht kjo letër nën tryezë është puç institucional, ngase zhvelërsohet krejtësisht institucionalizmi parlamentar dhe instalohet centralizmi dhe dogmatizmi në politikë ku vendimi politik është mbi rregullativën parlamentare dhe nuk është aspak në pajtueshmëri me teorinë e demokracisë. Një letër e tillë eshte dashur t’i adresohet parlamentit dhe për këtë të zhvillohet diskutimi i hapur. Forma e tillë e komunikimit me kryeministrin është metodë staliniste, dhe nuk ka të bëjë gjë fare me demokraci, është improvizm politik dhe formulë e kopjuar nga koha e Titos, kur diktatori jugosllav, diktonte rrjedhat politike me dekrete, duke i dhënë ngjyra letrës, që nënkuptonte zbatimin e urdhërave të diktuara politike, në kohë të caktuar politike. Letra i jep kompetenca shumë të gjëra zevendeskryeministrit kosovar Lutfi Hazirit, ndërsa e fundos politikisht z.Ceku, duke e penguar atë në kryerjen e detyrave qeveritare. Eshtë për habi një veprim i tillë kur kjo kryesi qëndron në kembë të luhatura pa bazë partiake. Eshtë më tepër se një vit që kryesia e LDK-së nuk ka tubuar anëtaresinë për të zgjedhur kryetarin e partisë, ajo vepron sipas modelit ish jugosllav të LKJ-së, partia kishte kryesinë e komitetit qendror të LKJ-së dhe kryesinë e pushtetit qendror, dhe e keqja e tashme është shumë më jostatutare dhe joligjore se ajo që ishte në kohën e “diktaturës proletare”, meqë vendimet politike i merrte Komiteti Qendror i LKJ-së, ndërsa i zbatonte kryesia e LKJ-së. Është brengosës fakti që në përpilimin e kësaj letre kanë marrë pjesë kryetari i Kosovës dhe kryetari i Kuvendit, i pari jep propozimin mandatarit për emrimin e ministrave ndërsa i dyti zbaton ligjshmërinë gjatë procedurës për emrim. Si njëri ashtu edhe tjetri si duket janë vetëm dekor i parlamentarizmit e asgjë tjetër, meqë me pajtimin e tyre u përligjë kjo parodi.




ADEM DEMAÇI: PËRGJIGJE PYETJEVE TË LEXUESVE

AHMET NAMANI: Si e komentoni DEKLARATËN E GRUPIT TË KONTAKTIT LIDHUR ME TAKIMIN NË NIVELIN MË TË LARTË MIDIS PRISHTINËS E BEOGRADOT MË 24 KORRIK NË VJENË?

A.D.- Kjo që thoni Ju, ishte dhe nuk ishte takim. Ishte njëfarë takimi sepse aty, në sallën e mrekullueshme të Vjenës, rreth tavolinës katërkëndshe ishin të pranishme katër palë: dy palët e konfrontuara, përfaqësuesit e regjimit tranzitor të Kosovës në krye me z. Fatmir Sejdiun dhe përfaqësuesit e regjimit të Beogradit, në krye me z. Koshtunicën. Aty ishin edhe pala udhëheqëse, drejtuese e tubimit, në krye me z. Ahtisarin dhe bashkëpunëtorët e tij, sidhe Grupi i Kontaktit, bashkë me disa organizata përcjellëse të botës, në cilësinë e dëshmimtarëve, të kontrolluesve, por besa edhe si të vëzhguesve të opinionit botëror. Në anën tjetër, kjo nuk ishte takim sepse palët e konfrontuara vetëm mund të shikoheshin, por nuk komunikonin me njëra tjetrën. Madje, në opinionin botëror, rrodhi një lajm që thotë se të dy palët konfrontuese as nuk janë çokur midis tyre. Të dyja palët kanë pasur nga 45 minuta për të shtruar qëndrimet e veta para opinionit botëror dhe para opinioneve të vendeve të veta. Serbia ka ofruar AUTONOMI THELBËSORE, kurse Kosova ka kërkuar PAVARËSI TË PLOTË. Bota (Ahtisari me Grupin e Kontaktit), ka shënuar ÇDO FJALË E ÇDO GJEST TË PALËVE TË KONFRONTUARA.
Tash, Ju lutem, lexojeni vetëm një pjesë të shkurtër nga deklarata e Grupit të Kontaktit:”...se duhet bërë të gjitha përpjekjet e mundshme(1) për të arritur një zgjidhje të negociuar(2) gjatë vitit 2006 e cila, ndër të tjera, është e pranueshme për shumicën e popullit të Kosovës(3) dhe e cila do të promovojë një shoqëri demokratike dhe multietnke(4) me një të ardhme të sigurt(5) për të gjithë qytetarët”.
Në deklaratën e Grupit të Kontaktit ka edhe gjëra tjera për t’u komentuar, por unë do të mjaftohem vetëm me nja disa pikë që kanë domethënie më të thellë nëse përqëndrohet vëmendja në to.
...”duhet të bëhen të gjitha përpjekjet e mundshme...” Ky formulim len të nënkuptohet se do të bëhen përpjekje të cilat palët e konfrontuara ( në të vërtetë ende armiqësore për shkak të qëndrimit ende hegjemonist dhe riokupues ndaj Kosovës të regjimit serb) ende nuk i kanë bërë dhe ende nuk i kanë përfunduar. Këto përpjekje nuk ka pushuar që t’i bënte Grupi i Kontaktit edhe deri më tash. Ata, pra GK, i përbërë nga SHBA-të, BRITANIA E MADHE, GJERMANIA, FRANCA, ITALIA DHE RUSIA, PRITËN PLOT 7 (shtatë) vjet që edhe materialisht e objektivisht regjimi i Beogradit të hiqte dorë nga POLITIKA HEGJEMONISTE E KRIMINALE E MILLOSHEVIQIT. Mirëpo, çfarë bëri regjimi i Beogradit për këto shtatë vjet? Ai vetëm ndërroi fjalorin e vet politik zyrtar, duke e shndërruar atë në një retorikë dinake e kozmetike, ndërsa objektivisht duke fshehur, dhe duke minimizuar para opnionit të gjerë serb rezultatet e politikës katastrofike të terrorizmit shtetëror serb ndaj popujve joserb në Serbinë e zgjeruar dhe gjithandej hapësirës së ish-Jugosllavisë. Madje, regjimi serb, pati paturpësinë që të PADISTE në instancat ndërkombëtare edhe Fuqitë demokratike të botës TË CILAT INTERVENUAN KUNDËR VEPRIMEVE MIZORE TË MILLOSHEVIQIT DHE ITHTARËVE TË TIJ NDAJ POPUJVE QË KËRKONIN LIRINË E PAVARËSINË E TYRE TË MERITUAR! GK si përfaqësues i botës, priti kot që regjimi i Begradit të ndërronte, të shpërbënte dhe të zëvendësonte mekanizmat partiake, ushtarake, policore, agjenturore e adminstraative, të cilat kishin frymëzuar, organizuar e ekzekutuar të gjitha veprimet gjenocidale, gjakatare e terroriste ndaj popujve të pafajshëm që kërkonin lirinë e tyre të shkelur e të shtypur me zjarr, me hekur E ME GJAK. Edhe sot, të gjitha këto mekanizma në shtetin serb mbetën e janë të paprekura! Bota demokratike e liridashëse, për shtatë vjet, priti që Serbia të pësonte ndryshime thelbësore e cilësore, por kot. Pas dorëzimit të Millosheviqit në Hagë nga ana e kryministrit të atëhershëm Gjingjiq, bota u tregua tepër dorëlirë ndaj regjimit të Beogradit. Me shpejtësi filmore UNIONI SERBI MALI I ZI U REHABILITUA DHE U PRANUA NË TË GJITHA ORGANIZATAT POLITIKE E FINANCIARE NDËRKOMBËTARE; IU FALËN GJYSMA E BORXHEVE; IU LEJUAN E PREMTUAN KREDI NDËRKOMBËTARE; NGA FIRMA TË NJOHURA PERËNDIMORE, NË FRYMËN E PROJEKTEVE PRIVATIZUESE, U BLENË DISA KAPACITETE TË RËNDËSISHME TË BANKROTUARA, OSE ASO PARA BANKROTIMIT TË SERBISË; U LEJUA DHE MADJE U NDIHMUA NGA SHBA-të DHE TURQIA PËRTËRITJA E MODERNIZIMI I INDUSTRISË USHTARAKE, PJESËRISHT TË DËMTUAR NGA BOMBARDIMET, TË SERBISË! Evropa e Amerika bënë “gjithçka që ishte e mundur” që Sebinë ta kthenin në rrugë të drejtë. Pas këtyre veprimeve të papritshme të shteteve të Evropës Perëndimore e të Amerikës në favor të popullit serb, regjimit serb, si thotë fjala popullore, “i doli tambli mbi përshesh”! Kriminelët e mafiozët e Serbisë menduan se ia hodhën Evropës. Ata, në vendse të bënin atë që priste bota prej tyre, ata bënë të kundërtën! Përsëri në pushtet u instaluan çetnikët e neofashistët dhe kur këta menduan se ishte momenti, urdhëruan “beretat e kuqe” që të likuidonin edhe njeriun që mundohej të kapte lidhjen me Evropën Perëndimere, kryeminstrin Zoran Gjingjiq. Edhe pas këtij krimi monstruoz, Bota demokratike, megjithkëtë, nuk deshi të shihte se nuk kishte bërë asgjë, ose më mirë të themi se kishte punuar fare gabimisht. Ajo, ende kishte iluzione se me lëshime të njëpasnjëshme kriminelët e mafiozët mund të ktheheshin në rrugën demokratike. Kur erdhi radha për të dorëzuar krykriminelët Mlladiq e Karaxhiq, përsëri u pa se bota demokratike nuk kishte bërë asgjë. Koshtunica nuk po i kapë dhe nuk po i dorëzon as Mlladiqin, as Karaxhiqin! Evropës nuk po i duhen dy kriminelë, por po i duhet dhe po pret që Serbia të ndryshojë thelbësisht natyrën e pushtetit të vet kriminal. Prapë luhatje të Evropës!... Tash Evropa, përsëri duke i bërë lëshime Serbisë në llogari të shqiptarëve e të Kosovës, po shpreson se do ta kthejë regjimin serb në drejtim të demokracisë. Prej nesh, ende pa qenë shtet, Evropa e Amerika po kërkojnë që në emër të të drejtave të pakicave, në emër të decentralizimit, në emër të sigurisë e të ruajtjes të objekteve kulturore e fetare Serbisë t’i lejohet që, në zemër të Kosovës, të formojë një mini-shtet serb etnikisht të pastër dhe me anën e tij të bllokojë tërë jetën tonë politike, ekonomike e kulturore. Qëllimi i regjimit kriminal e mafioz serb është që pasi që Kosovën TA MBAJË PËR NJË KOHË NË KRIZË TË PËRGITHSHME E TËVAZHDUESHME, SI “TERAPI” PËR NJË “SHËRIM” TË KRIZËS TË ANEKSOJË PJESËN E “SERBIZUAR” TË Kosovës! Qëllimi i kriminelëve e mafiozëve të Serbisë është që KOSOVA PËRFUNDIMISHT TË PALESTINIZOHET.
Në vendse bota Serbinë, për krimet e panumërta e të pafalshme, ta dënojë, ajo po e merr me të mirë e ne po na shtynë, “duke bërë gjithçka është e mundshme, që me regjimin serb të “GJEJMË NJË ZGJIDHJE TË NEGOCIUAR”! Me kriminelët e mafiozët e Beogradit?! Me çetnikët e neofashistët e Beogradit të “GJENDET NJË ZGJIDHJE E NEGOCIUAR E CILA DO TË ISHTE E PRANUESHME PËR SHUMICËN E POPULLIT TË KOSOVËS” E si të negociojmë, moj AMERIKË E MOJ EVROPË, ME NJË REGJIM QË BËRI GJITHATO KRIME GJITHANDEJ KOSOVËS? SI TË NEGOCINOJMË ME REGJIMIN QË ORGANIZOI E EKZEKUTOI MASAKRIN E PAPARË TË DUBRAVËS? SI TË NEGOCIOHET ME REGJIMIN QË NA I VODH EDHE KUFOMAT E TË VRARËVE PËR TË FSHEHUR KRIMET E VETA FASHISTE? SI TË NEGOCIOJMË ME REGJIMIN QË PO I FSHEHË ÇETNIKËT GJAKATAR DHE QË NUK PO E FSHEHË SE ËSHTË NË ANËN E TYRE? Për të gjetur zgjidhjen që do të vinte në pah VULLNETIN E SHUMICËS SË POPULLIT TË KOSOVËS ekziston instrumenti i verifikuar dhe i pagabuar e ky është REFERENDUMI. PËRSE, PRA, HEZITOHET?
Sa i takon, ...“promovimit të një shoqërie demokratike e multietnike”me ne shqiptarët, për një gatishmëri të tillë, pak ndonjë popull që mund të krahasohet. Prandaj GK dhe disa qarqe botërore, NË KËTË ÇËSHTJE, i “sulen portave të hapura”! Ne jemi ndër popuj të rrallë që në hapësirën tonë kombëtare kemi të inkorporuar tri besime të mëdha botërore, tri kultura të mëdha botërore dhe multietnicitetin e kemi të trashëguar që nga koha bizantine e otomane. Prandaj ne, pa na shtyrë kush, jemi duke ndërtuar dhe përsosur shoqërinë multietnike duke qenë të hapur edhe ndaj pakicës serbe pavarësisht që Beogradi, për qëllimet e veta kriminale, është duke u munduar të pengojë një proces të këtillë. Sa për të ...”krijuar një të ardhme të sigurt” kjo nuk do të varet vetëm prej nesh dhe pakicave që jetojnë në Kosovë. Kjo do të varet të shumtën nëse Serbisë nuk do t’i lejohet që të përzihet në mënyrë arbitrare dhe të palejueshme në rrjedhat normale të Kosovës. Tek e fundit Kosova është një vend i vogël i cili dëshiron që të jetë pjesë e pandashme e Evropës dhe që dëshiron të zhvillohet sipas standardeve evropiane dhe ne shqiptarët e kemi kuptuar që moti se liria jonë është e lidhur ngushtë me lirinë e të tjerëve dhe fati ynë është i pandashëm nga fati i gjithë njerëzimit.

SHAIP HAXHIU: Koshtunica e tha ofertën e vet. Çfarë keni Ju për të thënë?

A.D.- Koshtunica vetëm e ka përsëritur ofertën e Millosheviqit të vdekur. Falë mikut tim Fahri Musliut, korrespondent i shumë mediave nga Beogradi që ma dërgoi fjalimin e Koshtunicës mbajtur në Vienë, pata mundësi të njihesha në mënyrë më të plotë me qëndrimin e pushtetmbajtësve serbë lidhur me Kosovën. Është për t’u habitur se sa transparentë, sa u takon qëllimeve të padrejta, janë hegjemonistët e Beogradit. Është poashtu për t’u habitur fort se sa të paargumentuara janë kërkesat dhe “ofertat” serbe. Nga fjalët e z. Koshtunicës, për njeriun i cili nuk është i njohtuar me problematikën serbo-shqiptare duket sikur ndonjë shqiptari, ashtu kotnasikoti i ka shkuar ndërmend që të ndahet Kosova nga Serbia dhe tani z. kryeminstri sikur ka të bëjë me ndonjë adoleshent, përpiqet ta bindë atë që të heqë dorë nga mendimi i tij që i paskësh lindur kot!
Z. Koshtunica si pa të keq thotë përafërsisht kështu:”se Serbia nuk mund të lejojë që në 15% të territorit të vet të krijojë dikush tjetër një shtet...” Madje ai “sharron” edhe më thellë kur shton se ai nuk njeh ndonjë rast të këtillë e është i bindur se edhe të tjerët nuk njohin ndonjë rast të tillë në botë.
Kur njeriu mbron një qëndrim që është në kundërshtIm me LIGJIN E JETËS, ai, atëherë, më së paku bëhet qesharak. Një herë të shohim për këto rastet që nuk i njihka z. Koshtunica. Vallë, nuk e ditka zotëria, profesor i Univerzitetit nga Beogradi, se si u krijuan shtetet, se si u krijuan perandoritë e se si poashtu u shpërbënë, po shpërbëhen e do të shpërbëhen perandoritë e krijuara dhe të mbajtura me dhunë?! E di ai fare mirë, por bëhet sikur nuk e di se si ishin formuar dhe me kohë ishin shpartalluar Perandoria Mongole, Perandoria Romake, Perandoria Otomane, Perandoria Austro-Hungareze, Perandoria Spanjole, Perandoria Portugeze, Perandoria Angleze. Paj, si është e mundur dhe si e lejon veteen të bëhet aq i padijshëm? Paj edhe vetë shteti serb, është krijuar pas disa kryengritjesh kundër robërisë otomane. Paska harruar, zotëri profesori, kryengritjen serbe të 1804-shit, kryengritjen serbe të 1815-shit, kryengritjen serbe të 1830-shit? Edhe sulltani i atëhershëm thoshte se nuk mund të lejonte që dikush në 1% a 0,5% të territorit të Perandorisë otomane dikush tjetër të krijonte shtet më vete. Mirëpo, çka i kishte hije një diktatori e despot-sulltani të thoshte para dyqind e sa vjetësh, sot, zotëri profesor-“demokratit”, nuk i ka hije aspak. Madje, për të sot, t’i qesë nga goja ato fjalë në njërën nga qendrat e demokracive të avansuara të Evropës, është më tepër se turp, më tepër se kori! Paj, si u krijuan, lum Zotëria i paturp, gati 200 shtete të sotme të pavarura përveçse duke u shpartalluar perandoritë tjera para perandorisë jugosllave, të cilën qiftat e tij u munduan ta mbanin në këmbë me zjarr, me hekur e me gjak.
Por, mos ta çoj më gjatë këtë muhabet, Le të shohim si i bëri Serbia këto territore që pretendon se janë të sajat? Ju e dini këtë punë më mirë se unë, por për hatrin e lexuaesve të nderuar më duhet të kthehem paksa në histori.
Paj, këto që thotë zotëri profesori se janë toka serbe, në të vërtetë të gjitha janë toka të okupuara. Ai e di se kur kanë ardhur sllavët në Ballkan,? Në shekujt e gjashtë e të shtatë. Ai e di se kur është formuar shteti i parë serb i Rashkës? Në shekullin e dymbëdhjetë. Ai e di se si dhe kur janë pushtuar tokat e Toplicës e të Duboçics? Ai e di fort mirë se kur është bërë pastrimi etnik nga shqiptarët të mëse 650 fshatrave (muhaxheria e parë dhe dytë 1875-78). Ai e di fort mirë se kur është okupuar Kosova e Maqedonia nga forcat serbe të udhëhequra nga nga kral Petri e biri i tij Aleksandri. Në tetor-nëntor 1912. Vallë, me të drejtën e forcës e të okupimit qenkanë bërë tokat tona toka serbe?
Zotëri Koshtunica, “me zemërgjerësi na ofron autonomi thelbësore”. Z. Koshtunica po na trajton sikur ne të ishim ndonjë popull idiotësh e debilësh! Popujt sllavë nuk deshën dhe nuk duruan dot që të bashkëjetonin me një serbi gjithashtu sllave, por hegjemoniste e ne që nuk jemi fare sllavë, pas gjithë atyre mizorive që përjetuam nga regjimet serbe, na ofrohet përsëri një “autonomi”-robëri!
E keni Luginën e Preshevës për të treguar se si duket autonomia juaj thelbësore. I keni gjithashtu hungarezët, rumunët, boshnjakët e Sanxhakut e disa popuj tjerë që të tregoni se, me të vërtetë, keni ndërmend të demokratizoheni...

FETAH MALOKU: Pas të gjithave, zotëri Demaçi, a po i vie era PAVARËSI?

A.D.- Era po i vie, por vetëm me erë nuk jetohet, o, lum Fetahu!




ADEM DEMAÇI: PËRGJIGJE PYETJEVE TË LEXUESVE


ARSIM DURIQI: Korrupsioni NË KOSOVË dhe idealizmi i njeriut të quajtur HASAN PRETENI! Çfarë mendoni Ju për këtë fenomen?

A.D.- Mos na lashtë ZOTI pa idealistë! Idealistët e kanë mbajtur dhe e kanë çuar botën përpara. Pak për t’u qeshur, në këto kohëra të vapës sonë politike dhe pak për të zhvilluar një dialog me Ju zotëri Arsim, po Jua tregoj një anekdotë për Nastradin Hoxhën, mjaft të njohur edhe në hapësirën tonë shqiptare. Qet pashai i asaj kohe, për të bërë hoka me njerëzit e memleçetit, një kumtesë:”KUSH MA MËSON GOMARIN PËR TË FOLUR BRENDA KATËR VJETËSH I FITON NJËQIND DUKETË”! Populli qeshte.Kush guxonte që të merrte një ndërmarrje të atillë mbi vete? Dëgjon Nastradini për këtë “ofertë” dhe, pa një pa dy, shkon drejt te pashai. Merr përsipër kushtin dhe me kapistrin përdore, për midis pazarit, po kthehej, nga pallati i pashait. Të gjithë ngarruan rreth tij. “Hej, Nastradin, a je në vete, a mësohet gomari të flasë”? Ai, vetëm vazhdonte rrugës pa kthyr kokën. Dikur u bë kallaballëk i madh dhe hoxha u ndal e tha: “Ikni, bre popull! Më leni rehat! Ju, nuk jeni në vete”! “Si, or Nastradin ne nuk jemi në vete?! Ku ke dëgjuar ti GOMARI të flasë?! Ti nuk je në vete e jo ne”! Nastradin Hoxha, më në fund, kinse i nervozuar, i hypi gomarit dhe i krekosur ngriti dorën lart duke cingërruar lirat në qesen e mëndafshtë e tha:”O, popull tuaf! Paj, BRENDA KATËR VJETËSH, OSE DO VDESË PASHAI, OSE DO VDESË UNË, OSE DO TË NGORDHË GOMARI”! Populli ngeli duke sjellur kokën, ndërsa Nastradini vazhdoi rrugën mbi gomar. E pyetën:”Kah po ia mba o, Nastradin”? “Andej kah e ka bërë mend gomari”.
Duket se në kohërat e Nastradinit katër vjet paskanë qenë goxha të gjatë! Mirëpo, këtu te ne, koha është duke fluturuar dhe shumë shpejt do të shihet se zotëri HASAN PRETENI PASKËSH QENË NJË IDEALIST FORT I GUXIMSHËM. Por, unë kam qenë, jam dhe do të jem me idealistët. Prandaj, disa fjalë dua t’i këmbej me zotëri PRETENIN. Vallë, e di zotëriu se kush janë ata që e kanë zgjedhur në atë post tejet të rëndësishëm? Fakti se ata zotërinjë e kanë zgjedhur z. PRETENIN në atë post nuk do të thotë se ATA KANË NDRYSHUAR NATYRËN E TYRE PREJ KORRUPTUESISH DHE TË KORRUPTUARISH. Ata që kanë përcjellë fjalët e z. PRETENIT mund të binden për ZEMËRBARDHËSINË E TIJ PREJ IDEALISTI. Ai thotë:”Mirëpo më gëzon fakti se si qytetar i thjeshtë, nuk kam qenë i kyçur në asnjë parti politike, por në mënyrë të drejtë kam konkuruar, jam intervistuar dhe jam zgjedhur drejtor pa asnjë intervenim. Kjo tregon se diçka funksionon, nuk është gjithçka keq edhe tek institucionet”. Sa pak duhet që njeriu zemërbardhë të mashtrohet! Vetëm që ta zgjedhin dhe ta vendosin në post! Zotëri PRETENI vazhdon me të njëjtin idealizëm:”Do të tentoj që këtë pavarësi me sjelljen time dhe imazhin që kam krijuar deri më tani ta përcjell dhe ta bart në agjencinë. Të krijoj një agjenci me njerëz të cilët nuk kanë qenë të kyçur në parti politike ose që nuk janë bartës të funksioneve ose të kenë kryer çfarëdo veprimi tjetër në organizata të ndryshme”. Bukur sa s’ka! Po e zëmë se do të gjejë njerëz çfarë premton e mendon z. PRETENI dhe se nuk do të përzihet askush në përzgjedhjen e njerëzve që ai ka ndërmend të angazhojë në punën e tij. Dhe, shikoni Ju si mendon z. PRETENI ta kryej punën e vet qëllimmirë. “Këtu kam parasysh krijimin e një veb-faqeje të Agjencisë ku njerëzit mund të kontaktojnë, të paraqesin ndonjë vepër korruptuese dhe më pastaj do t’i paraqitet prokurorisë”. Ah, fort i dashuri Hasan PRETENI! Mendoni se me aq do ta kryeni detyrën Tuaj? Ju duhet ta dini, ose do ta dini se sa padi e materiale ka nëpër prokuroritë tona të cilat zvarriten me vite pa kurrfarë rezultati. Ju duhet ta dini se kush komandon me prokuroritë e me gjyqet tona, me policinë e Qeverinë tonë, me Prsidencën e me Kuvendin tonë. Pikërisht, për këtë arsye, aty mbeten për të gjetur zgjidhje me mijëra lëndë “prej Shën Mitrit e në Shën Gjergj e prej Shën Gjergjit e deri në Shën Mitër”! A e dini Ju, zotëri zemërbardhë se me dhjetëra mijëra VENDIME TË PLOTFUQISHME gjyqësore presin me vite përmbarimin e tyre? Nuk ka mekanizëm përkatës që t’i ekzekutojë! Përse, vallë? Sepse kushtuakan shumë shtrenjtë ato mekanizma! Prandaj më lirë po kushtuaka që të mos arrestohen e të mos ekzekutohen sanksionet ndaj fajtorëve! Nuk i dini këto, prandaj edhe keni marrë mbi vete një detyrë tejet humane, por edhe tejet të koklavitur. Unë i DHASH vetes të drejtë që, me këto pak fjalë, të Ju përgatisja psiqikisht që të mos sëmureni kur ta merrni vesh të vërtetën e hidhur për funksionalitetin e institucioneve të Kosovës. Dhashtë ZOTI e gjërat ndryshofshin prej momentit kur Ju ta filloni punën Tuaj të rregullt!

ISMAILHAKI IBRAHIMI: Ju lutem për analizën Tuaj lidhur me rezultatet e zgjedhjeve në Maqedoni dhe çfarë më tutje?

A.D.- Zgjedhjet në Maqedoni ishin jo vetëm një ngjarje me rëndësi politike, por ishin edhe një test i fortë për shkallën e vetëdijes politike të popullit atje dhe të elitës politike të popullit atje. Pjesëmarrja zhgënjyese në procesin zgjedhjor të qytetarëve flet se ata shumë shpejt janë lodhur nga politika dhe se nuk iu intereson gjithaq fati i tyre politik. Shumë keq! Sa i takon elitës sonë politike shqiptare atje, u bënë disa gjëra që na dëshpëruan jo pak. “Lufta” për pushtet herë-herë, si këtu tek ne, lente nën hije interesin kombëtar. Në këtë frymë pati madje edhe veprime kriminale. Fort keq! Pas numërimit të votave ishte e qartë se elektorati maqedonas lëvizi në të djathtë. Fitoi partia VMRO-DPMNE e udhëhequr nga z. GRUEVSKI. Mirëpo fitorja e z. Gruevski nuk ishte aq e madhe sa të mund të formonte qeverinë vetë. Partia e tij bëri disa “sondazhe” për të gjetur partnerët e përshtatshëm për një qeveri stabile. PDSH-ja e Arbër Xhaferit nuk fitoi besimin e plotë të elektoratit shqiptar, por fitoi aq vota sa të mund të bëhej një partner i mirë për Gruevskin. Kjo parti edhe para votimeve kishte marrëveshjen me z. Gruevskin për një koalicion eventual. Në anën tjetër, Partia shqiptare BDI e Ali Ahmetit, deri në fund të mandatit të shkuar kishte qenë në koalicion me partinë SDM të z. Buçkovski. Deri atëherë BDI-ja ishte llogaritur si parti e majtë edhepse te ne shqiptarët ende nuk janë kristalizuar sa duhet të majtat e të djathtat. Në botë dihet, të majtat mbrojnë interesat e klasës punëtore, të djathtat mbrojnë kapitalin, partitë liberale mbrojnë shtresat e mesme. Në momentin kur Partia e Gruevskit, nën trysninë e faktorit të jashtëm u luhat për të marrë në koalicion edhe BDI-në, nga PDSH- ja u dëgjuan zëra që bënin të ditur se “lufta” për pushtet e kolltuqe ua mori anën interesave kombëtare e interesave të stabilitietit rajonal. Tingëlloi jo fort bindëse fjala e Arbër Xhaferit kur ai brengosej se mos skena politike e Maqedonisë do të mbetej pa “opozitë”! Por edhe në anën tjetër, dukej një situatë fort e pakëndshme kur Ali Ahmeti, vetëm për hatër të kolltuqeve shtyhej e lakohej për të hyrë në koalicion me Gruevskin e me Arbër Xhaferin! Madje, sipas disa zërave që mbërritën këtu te ne sikur z. Ali Ahmeti, në një moment paska pas thënë se “nëse BDI-ja do të mbetet jashtë koalicionit, në Maqedoni do të ketë probleme”! Trysnia ndrëkombëtare për të përfshirë edhe BDI-në në koalicion, si duket po vazhdon. Si thonë mediat, për t’u mbrojtur e për të forcuar pazarin, z. Gruevski i qenka drejtuar z. Ali Ahmeti me kërkesën që ky të kërkojë falje për deklaratën “kërcënuese” që ky e paska pas bërë. Pak kush dyshon se z. Ali Ahmeti nuk do të formulojë ndonjë fjali në formë të kërkimfaljes. I ëmbël i shkreti pushtet! Me pak fjalë, u pa se interesat po dominojnë mbi idealet! Ne, qytetarët e thjeshtë të Kosovës, vëllezërit tanë kudoqë janë i përjetojmë dhe dëshirojmë që t’i shohim si një terësi e papërçarë sikundër që të tjerët shqiptarë, jashtë Kosovës, ne dëshirojnë të na shohin të bashkuar dhe të papërçarë. Mirëpo, kur politika shndërrohet e zbërthehet në interesa individuale e grupore, atëherë përçarjet janë të gatshme. Duhet t’i shohim realitetet e reja, por nuk duhet t’i pranojmë dhe të mësohemi me to. Sepse edhe nga përvoja jonë më e re e pamë se ku na sollën e sa na kushtuan e sa po na kushtojnë ndarjet e përçarjet në interesa individuale e pjesore me kohëzgjatje të përkohshme.

HAJREDIN BYTYÇI: Ju lutem, “QENDRA ADMINISTRATIVO PROTOKOLARE”, në Gërmi, po ose jo?

A.D.- Zotëri Hajredin, e vërteta nuk është gjithëherë po, ose jo, bardh, ose zi. Rasti i “Qendrës Administrative Protokolare” (QAP) është pasqyrë e mjerë e shoqërisë sonë ku në pushtet vazal, me vota të manipuluara, janë sjellur kojtaxhinjtë, çallëmxhinjtë e dallaverexhinjtë. Të hollat e popullit të mjerë e të shkretë po keqpërdoren në një mijë mënyra. Kjo që u bë me QAP-in është shembulli më i shëmtuar i këtij lloji. Është dëmtuar në mënyrë të pafalshme e vetmja pushimore malore që ka Prishtina. Dmth. është bërë një dhunim i natyrës së bukur e të blertë dhe është cunguar e drejta elementare e qytetarëve të kryeqytetit tonë. Për të bërë zefk nëpër bazene e sauna dhe nëpër apartamente ultraluksoze e për të qitë çallëm Kosova e varfër para Evropës së pasur, është hyrë në investime të hatashme financiare në kohën kur Kosova ka mëse 130.000 pensionistë të cilët duhet të jetojnë me 40 Evro në muaj! Në kohën kur ekonomia kosovare eksporton vetëm 4% ndërsa importon 96%, në kohën kur Kosova ka papunësinë e varfërinë më të madhe në Evro-Azi, ne po na ndodhin skandale të këtilla politiko-ekonomike!
Kuvendi në saksi i Kosovës bëri një gjest hipokrizie. Pasi që janë shpenzuar gati 2 milon Evro dhe u bë sakatosja e ambientit të bjeshkëve të Gërmisë e “studioi situatën” dhe i gjeti arsyet që të vazhdojë e të përfundojë krimin e vet. Është e arsyeshme që nuk do të paguhej në asnjë mënyrë që godina e ngritur, deri diku, të rrëzohet. Por nuk është aspak e arsyeshme që kriminelët që shpërdoruan të hollat e popullit të falen e madje të shpërblehen. Mendoj se shumica e popullit të ndërgjegjshëm të Kosovës janë për rekonstruktimin e godinës dhe për përshtatjen e saj për një destinim tjetër në të mirë të shumicës së popullit të Kosovës. Propozimi i Këshillit për Mbrojtjen e të Drejtave e të Lirive të Njeriut që kjo godinë të përshtatet për një QENDËR ANTI – TUBERKULARE të Kosovës është fort i mirë. Por, si po dëgjoj, një qendër e tillë tashmë ekziston dhe funksionon në malet e Pejës, mirëpo kapaciteti i tij shfrytëzohet përgjysëm. Ngritja edhe e një kapaciteti të ngjashëm nuk do të ishte i domosdoshëm dhe për më tepër mirëmbajtja e tij do të ngarkonte tejmase buxhetin e Kosovës. Unë kam një propozim që do të kishte vlerë fort të madhe për Kosovën dhe njëkohësisht, jo vetëm që nuk do të ngarkonte buxhetin e Kosovës, por edhe do të ndihmonte në mënyrë të gjithanshme zhvillimin e Kosovës. Kjo do të ishte: “QENDRA E KULTURËS NDËRKOMBËTARE”(QEKUND). Ose edhe më mirë:“QENDRA E MIQËSISË DHE KULTURËS NDËRKOMBËTARE” (QEMIKUND).
Në këtë mes rol vendimtar do të mund të luante Gjyqi Kushtetues i Kosovës i cili me vendimin e tij të drejtë, duke çfuqizuar vendimin e shtrembër të Kuvendit në saksi të Kosovës për të vazhduar punimet në godinën në fjalë do të mund të shpëtonte nderin e vet si gjyq i paanshëm dhe do të mund të ndikonte që çështja rreth kësaj godine të marrë rrjedhë të drejtë dhe në interes të Kosovës. Pas një vendimi të këtillë eventual, Presidenti i Kosovës do të mund të merrte një vendim special që godina në ndërtim të marrë destinim të pacaktuar deri në përfundimin e veprimeve që do të definonin fatin e saj.
Ja, çfarë, në vija të trasha do të mund të ndërmerrte Presidenti i Kosovës:
1. Të marrë kontakt të drejtpërdrejtë me përfaqësuesit diplomatik të NËNTË SHTETEVE MË TË RËNDËSISHME, MË TË MËDHA E MË TË ZHVILLUARA TË BOTËS. KËTO SHTETE SIPAS TË GJITHA VLERËSIMEVE JANË: SHBA-të, GJERMANIA, JAPONIA, RUSIA, KINA, BRITANIA E MADHE, FRANCA, ITALIA E KANADAJA.
2. Këtyre shteteve Presidenti i Kosovës do t’ua sygjeronte këtë PROJEKT-RPOPOZIM:
3. Godina do të mund të tejtrajtohej në një pallat nëntëkatësh dhe secili nga shtetet e lartpërmenduara do të mund të dispononte me njërin nga katet. Në katin e “vet” çdo shtet përkatës do të mund të mbante një ekspozitë të përhershme historike-gjeografike, teknike-teknologjike, kulturo-artistike e tregëtare-turistike. Kati do ta kishte sallëm e kinemasë ku do të shfaqeshin filmat e produksionit të shtetit përkatës. Atje do të ishte teatri ku do të mund të shfaqeshin pjesë teatrore, opera, balete e koncerte muzikore të autorëve të shtetit përkatës. Në këtë kuadër do të ishte biblioteka adekuate e shtetit përkatës. Nuk do të mungonte edhe salla në të cilën publiku kosovar do të mund të konsumonte pije e ushqime nga kuzhina e shtetit përkatës.
Kjo do të ishte ideja e pakompletuar dhe në vija shumë të trasha. Detalet e modalitetet tjera shërbyese e financiare lidhur me ndërtimin e shfrytëzimin e këtij objekti DO TË MUND TË DISKUTOHESHIN ME SHTETET MIKE. Nëse ndonjeri shtet nga këta të propozuarit nuk do të kishte interes për një bashkëpunim të këtillë do të mund të zëvendësohej me shtete tjera mike që kanë interes për bashkëpunim të këtillë.
Sa di unë një qendër të këtillë nuk e ka asnjë shtet i botës. Edhe një arsye më shumë që të paktën në një punë të hijshme e të mbarë të jemi të parët e botës.
Zotëri Fatmir Sejdiu, ja një punë e dejë për Ju. Por, nuk e di nëse Ju shkohet fjala në këtë Kosovë të korruptuar deri në fyt?



ADEM DEMAÇI: PËRGJIGJE PYETJEVE TË LEXUESVE

ALBAN GASHI: Z. Demaçi, cila parti, tashpërtash, i ka kuadrot më të “forta”?

A.D.- Po e kuptoj se çfarë doni të thoni me atë fjalën të “fortë”. E kam thënë disa herë, por nuk është keq që ta përsëris të vërtetën e ditur se si është qumështi e tillë është edhe maza:qumështi i dhisë e ka mazën përkatëse, me më pak yndyrë, qumështi i dhenëve e ka mazën përkatëse me më shumë yndyrë. Në këtë drejtim të mendimit mund të përfundojmë se në çfarë niveli është populli në atë nivel përkatës e ka edhe elitën e vet politike. Mirëpo, meqë jemi në fushën e politikës duhet të përcaktohemi edhe për definicionin e politikës. Në përdorim ka shumë definicione, që nga përkufizimi më serioz e deri te përkufizimet më pak serioze e deri te përkufizimi që, fatkeqësiaht është më joseriozi, por edhe më i përhapuri në popullin tonë, që politikën e definon si RRENË, GËNJESHTËR, ose MASHTRIM! Në vazhdën e këtij definicioni të çoroditur rrjedh se POLITIKANI SA MË SHUMË TË RREJË E TË GËNJEJË DHE SA MË SHUMË TË MASHTROJË AQ POLITIKAN MË ZOTI E MË I MADH ËSHTË!

E, në të vëertetë POLITIKË ËSHTË TË VEPRUARIT DUKE PASUR PARASYSH ME MILIARDA E MILIARDA FAKTORË QË VEPROJNË NË SHOQËRI E NË NATYRË. Pra, kush ka kapacitet që të thellohet në këtë definicion e ka të qartë se politika nuk është as rrenë, as gënjeshtër, as mashtrim, por është e kundërta e këtij nocioni. Rrenë, gënjeshtër a mashtrim është vetëm për aq sa shkenca mashtrohet në zbulimin, ose vlerësimin e thelbit të faktorit që merret parasysh. Deri para pesëdhjetë vjetësh, sipas politikës shëndetësore e cila mbështetej në zbulimet e deriatëhershme shkencore, mendohej se mishi e qumështi janë faktorë shëndetësorë për të githë njerëzit. Mirëpo sot, politika shëndetësore e mbështetur në zbulimet më të reja shkencore mendon se mishi jo për të gjithë njerëzit është faktor shëndetësor. Sot politika shëndetësore, në bazë të hulumtimeve më të reja shkencore, thotë se edhe qumështi jo të gjithëve u bën mirë. Sot edhe shumë shtete me traditë të cilat dikur kanë derdhur gjak e gjak për të mbrojtur kufijt e vet, në bazë të interesave të sotme, konkrete, ekonomike, janë duke u përpjekur që të heqin dorë nga kufijt e vet e të bëhen pjesë e Bashkimit Evropian. Me pak fjalë, ndërsa dikur, kufiri i shtetit, për shumë kombe e shtete, ishte faktor stabiliteti e prosperiteti, sot kufiri, për shumë shtete, po bëhet pengesë për një stabilitet e prosperitet edhe më të madh. Mirëpo të gjithë popujt, të gjitha kombet e të gjitha shtetet nuk janë në të njëtën fazë të zhvillimit material e mendor. Prandaj edhe njerëzimi, në rrugën e pandalshme të zhvillimit të vet, po ecën, herë më ngadalë, herë më shpejt, duke kaluar nëpër kundërthënie herë më të vogla, herë më të mëdha. Sikur udhëheqësit e regjimit hegjemonist, çetniko-neofashist serb t’i kishin pasur parasysh të gjithë faktorët politik, ekonomik e vetëdijsorë që vepronin në Kosovë, në Serbi, në ish-Jugosllavi, në Ballkan, në Evropë e në botë, duke u mbështetur në analiza të sakta shkencore, sigurisht që nuk do ta fillonin AVENTURËN E TYRE POLITIKO-USHTARAKE E CILA SHKAKTOI SHPARTALLIMIN E PLOTË TË ISH-JUGOSLLAVISË DHE IZOLIMIN E TYRE TË PLOTË. Sikur në krye të regjimit të sotëm serb të ishin, si thoni Ju, kuadro të “forta”, ata, në rend të parë, do ta kishin parasysh interesin e shtetit serb dhe prandaj kurrsesi nuk do të insistonin në riokupimin e Kosovës. Mirëpo, ata, në rend të parë kanë parasysh interesat e tyre që të vijnë, ose që të mbeten sa më gjatë në pushtet, prandaj edhe valvitin kaq me kokëfortësi flamurin e riokupimit të Kosovës, duke llogaritur në nivelin e ulët të vetëdijes politike të popullit serb. Falë asaj vetëdijeje të ulët ata patën arritur që të merrnin votat e përkrahjen e shumicës së popullit serb që të fillonin AVENTUARËN E TYRE TË PËRGJAKSHME E KRIMINALE. FALË KËSAJ VETËDIJEJE TË ULËT KËTO KUADRA ENDE JANË NË PUSHTET DHE PO I PËRGATISIN POPULLIT TË VET EDHE NJË GJAKDERDHJE TË RE KRIMINALE. Pra, populli serb, si po shihet, ende e ka udhëheqjen dhe kuadrat politike të atilla që mund t’i ketë dhe aso çfarë i meriton.

Edhe ne këtu në Kosovë i kemi partitë dhe kuadrat në ato parti ashtu si jemi ne vetë si popull dhe ashtu si i meritojmë. Cili popull përveç popullit tonë me këtë vetëdije të shkretë do të votonte përsëri për liderët të cilët jo vetëm që nuk morën pjesë në KRYENGRITJEN ÇLIRIMTARE, por edhe bën ç’mos për të penguar kryngritjen tonë çlirimtare, nën udhëheqjen e UÇK-së? Cili popull, përveç popullit tonë me vetëdije të fjetur, do të votonte për liderët të cilët nënshkruan dokumentin me të cilin pajtoheshin që Kosova të mbetet nën integritetin e sovranitetin e Serbisë e cila na i shkaktoi gjithë ato tragjedi e mizori?

Në partitë për të cilat po më pyetni mua, me shumë pak përjashtime, janë grumbulluar individë të cilët, në rend të parë e mbi të gjitha, kanë vënë interesat e veta personale e pastaj interesat e Kosovës.Prandaj, aty mos i kërkoni kuadrat e “forta”. Po, mund të më thoni, si është e mundur që me këto kuadra “jotëforta”, megjithate, po përparojmë ngadalë? E para, ata që ishin shtylla kurrizore e kryengritjes dhe të cilët ranë në vijat e para të fronteve të luftës çlirimtare ishin kuadra SHUMË TË FORTA DHE SHPËTIMIN E SUBSTANCËS SONË KOMBËTARE UA DETYROJMË PIKËRISHT ATYRE. E dyta, lufta jonë çlirimtare, përkundër gabimeve të shumta që u bënë ishte dhe është e drejtë dhe në përputhje të plotë me LIGJIN E JETËS i cili i çon të gjithë drejt lirisë e pavarësisë. E treta, kjo që po dalim, dalngadalë, nga kurthi i Rambuje-Parisit dhe nga Rezoluta 1244 e KS e ka burimin te gabimet TRASHANIKE DHE TË NJËPASNJËSHME TË “CËRNA RUKËS” DHE TË PARTIVE ÇETNIKE-NEOFASHISTE NË SERBI TË CILAT PËRSËRI, PAS LUFTE, U INSTALUAN NË PUSHTET DHE VAZHDUAN E PO VAZHDOJNË POLITIKËN E MILLOSHEVIQIT TË “HEROIZUAR” në Hagë. Pra, vetëdija e popullit serb ende është në shkallë aq të ulët saqë ai ende po PRODHON NJË ELITË TË KËTILLË E CILA ËSHTË VETË “MAZA” E POPULLIT SERB, prandaj ky popull ende nuk po ka fuqi që të lirohet nga ajo, OSE THËNË MË QARTË NUK PO KA FUQI QË TË LIROHET NGA VETËROBËRIMI I VETVETES. Në këtë ecje të vetëdijsimit edhe të faktorit ndërkombëtar ka ndikim EDHE PROTESTA QYTETARE E 17 MARSIT TË VITIT 2004 SIDHE “LËVIZJA VETËVENDOSJE” QË GJITHNJË E MË TEPËR PO PËRKRAHET EDHE NGA GRUPE TJERA QYTETARE. LIGJI I JETËS, NË MËNYRË TË PANDALSHME PO KRIJON E DO TË KRIJOJË SITUATA, PO PJELL E DO TË PJELLË FORCA TË REJA TË CILAT PO NA SHTYJNË, DASHTË E PADASHTË EDHE NE EDHE SERBINË DREJT LIRISË, PAVARËSISË E SOVRANITETIT. POR PIKËRISHT PËR MUNGESË TË KUADRAVE TË FORTA, SEPSE SI POPUJ JEMI ASHTU SI JEMI, PO VONOHEMI TË DYJA PALËT EDHE NE SHQIPTARËT EDHE POPULLI SERB. Ligji i jetës as nuk falë as nuk ndëshkon, por të gjithëve ua jep atë që meritojnë. LIGJI I JETËS QË SËSHTË VETË LIRIA E PAVARËSIA, neve, herët ose vonë, do të na e japë ATË PËR ÇKA PO LUFTOJMË SEPSE JEMI NË PËRPUTHJE ME TË DHE PO SHKOJMË NË TË NJËJTIN DREJTIM ME TË. Popullit serb, Ligji i jetës po ia jep lirinë DUKE E LIRUAR NGA BARRA E POPUJVE QË VETË KISHTE ROBËRUAR DHE QË DISA PREJ TYRE ENDE PO MUNDOHET T’I RIOKUPOJË OSE T’I MBAJË EDHE MË TUTJE NË ROBËRI...

RAGIP FUSHA: Përse Agim Çeku nuk po e pranon ballafaqimin në TV publik me zotëri Kuçin? Ju lutem për komentin Tuaj.

A.D.- Paj, ma merr mendja se z.Agim Çeku nuk ka interes që të hyjë në debate nga të cilat nuk ka argumente për të dalur fitimtar, prandaj nuk don të lodhet kot. Nuk besoj se edhe z. Hajredin Kuçi, po të ishte në postin e z. A. Çeku, do të pranonte ndonjë debat të kësaj natyre me cilindo nga opozita. Z. Agim Çeku ka punë shumë më të rëndësishme se sa “me rrehë ujë në havan”! Por e keqja është se nuk po ka as “havan” as ujë sa duhet!

DRITA BERBERI: Fatmir Sejdiu, para Këshillit të Sigurimit, në Nju Jork, jo si statist, por si ligjërues. Ju lutem, cili është komenti Juaj?

A.D.- Paj, nuk është kjo ngjarje aq e vogël dhe krejt e parëndësishme si mundohen ta paraqesin disa jashtë e brenda Kosovës. Vërtet, kjo do të jetë vetëm një vizitë joformale dhe jozyrtare, sepse s’ka si të jetë ndryshe meqë Kosova ende nuk është anëtare e Kombeve të Bashkuara, mirëpo,megjithatëë kjo është një dalje nga vazhda e deritashme e trajtimit ndërkombëtar të Kosovës. Kjo vizitë e ky nder që i bëhet z. Fatmir Sejdiut ka tre qëllime. Qëllimi i parë është që Kosova të joshet e të gëzohet dhe “nga gulshimi” të mos kursehet me lëshimet e veta ndaj kërkesave të pangopshme dhe të padrejta të Serbisë. Qëllimi i dytë mund të jetë një lloj trysnie ndaj Serbisë që të angazhohet më shumë e më seriozisht lidhur me kapjen e dorëzimin e të pandehurve Ratko Mlladiq e Radovan Karaxhiq në Tribunalin e Hagës. NË TË VËRTETË E NË THELB BASHKËSIA NDËRKOMBËTRE INSISTON NË KËTË KËRKESË ME QËLLIM QË SERBIA TË HEQË DORË NGA FRYMA E VET HEGJEMONISTE, NGA FILOZOFIA E VET PROVINCIALISTE E MESJETARE DHE TË RRËZOJË NGA PUSHTETI, PËRMES VOTËS SË LIRË QYTETARE, “OKTOPODIN” ÇETNIKO-NEOFASHIST. Qëllimi i tretë është që, në një mënyrë, duke nxjerrë Kosovën nga sovraniteti i Serbisë, të shkelet Rezoluata 1244 e KS dhe të përgatitet terreni e atmosfera për nxjerrjen e një rezolute të re lidhur me statusin e ardhshëm të Kosovës. Sa për fjalë z. Fatmir Sejdiu, le të shpresojmë se nuk e ka LËNË KEQ. Ndoshta, me qëllim të kompletimit të argumentologjisë sonë në favor të pavarësisë e të sovranitetit të domosdoshëm të Kosovës, nuk do të ishte e pavend që z. Fatmirit t’ia p;rkujtoja edhe nja dy argumente bazë në favor të pavarësisë e sovranitetit tonë. I pari t’u përkujtohet atyre zotërinjve të qendrave të mëdha vendosëse të botës edhe kjo: NËSE ATA ZOTËRINJ DUAN SERIOZISHT TË LUFTOJNË TERRORIZMIN SHTETËROR NË BOTË, E, DUAM TË BESOJMË SE ATA DUAN, ATA ME QËNDRIMIN E TYRE TË PAKOMPROMIS NDAJ TERRORIZMIT SHTETËROR SERB DUHET T’UA BËJNË ME DIJE TË GJITHË TERRORISTËVE AKTUALË DHE TË GJITHË TERRORISTËVE POTENCIALË TË BOTËS SE TERRORIZMI SHTETËROR E AS GRUPOR NUK DO TË TOLEROHET DHE NUK DO TË SHPËRBLEHET. E dyta, Fuqive udhëheqëse të botës, edhe një herë duhet t’u sqarohet se NËSE ATA DUAN DHE BESOJMË SE DUAN QË SERBIA NJË HERË E PËRGJITHMONË TË MARRË RRUGËN E DEMOKRACISË SË VËRTETË, ATËHERË AJO DUHET TË LIROHET NGA AMBICJET E SAJA HEGJEMONISTE E IMPERIALISTE NDAJ POPUJVE TJERË. SEPSE PËR TË MBAJTUR SERBIA NËN SUNDIMIN E VET POPUJ TJERË ASAJ DO T’I DUHET EDHE MË TUTJE TË RUAJ E TË KULTIVOJË NJERËZ TË CILËT, EDHE MË TUTJE, DO TË JENË TË GATSHËM TË BURGOSIN, TË SHTYPIN E TË VRASIN NJERËZ LIRIDASHËS E TË PAFAJSHËM. E, ME USHTRI E POLICI TË TILLË VRASTARE NUK NDËRTOHET E NUK ZHVILLOHET DOT DEMOKRACIA E VËRTETË. PRANDAJ DHE, LIRIA, PAVARËSIA E SOVRANITETI I KOSOVËS JANË PARAKUSHTE TË LIRISË, PAVARËSISË E SOVRANITETIT TË SERBISË...




ADEM DEMAÇI:PËRGJIGJE PYETJEVE TË LEXUESVE


ALBERT GJONI: Ju lutem, a nuk përtoni që ta bëni një vështrim më të thelluar lidhur me “vlimet” në LDK?

A.D.- Pyetja që bëni Ju, në shikim të parë duket sikur kemi të bëjmë me një çështje që ka të bëjë vetëm me një parti, qoftë ajo edhe partia më e madhe. Mirëpo, duke qenë i vetëdijshëm se kemi të bëjmë me një fuqi politike e cila edhe tash ka ndikim të madh në jetën tonë politike, atëherë e vlen që të merremi më gjerësisht me fenomenologjinë e LDK-së. “Vlimet”, që thoni Ju, janë e për çdo ditë e më tepër do të jenë të pranishme në LDK e në Kosovë. Sepse “vlimet” kanë qenë e janë mbajtur të bllokura gjatë në Kosovë. Dhe, qendra e këtyre bllokimeve ka qenë LDK-ja. Prandaj ato kanë filluar në LDK dhe shumë shpejt do të përfshijnë tërë Kosovën. Për ta kuptuar fenomenin në gjithpërfshirjen e vet, për t’i kuptuar të gjitha ato që kanë ndodhur në Kosovë e rreth Kosovës, për të kuptuar të gjitha këto që po ndodhin sot me ne e rreth nesh, për t’i kuptuar të gjitha ato që do të ndodhin me ne e rreth nesh, duhet të kthehemi paksa në histori.
Ata që mbajnë mend dhe që duan t’i thonë gjërat troç dhe të cilët përveç interesit të Kosovës e të kombit dhe interesit për të vërtetën nuk kanë ndonjë interes tjetër, nuk e kanë të vështirë t’i shohin gjërat qartë. Por, ata që janë të mbërthyer pas interesash të ditës, pas interesash personale e grupore, nga mjegullnaja e krijuar dhe nga kozmetika e përdorur me të madhe e kanë paksa të vështirë të kuptojnë se për çfarë është fjala dhe se ku do të dalë e si do të përfundojnë këto “shtërzime” politike brenda LDK-së dhe jo vetëm brenda LDK-së.
Ata që nuk harrojnë e dinë fare mirë historinë e formimit dhe të lëshimit në veprim të LDK-së. Unë di shumë të vërteta që kam dëgjuar nga dëshmitarë dhe nga individë të ndërthurur drejtpërdrejt në formimin dhe lëshimin në veprim të LDK-së, mirëpo meqë këta individë, të cilët janë gjallë, por që dje frikoheshin nga sigurimi serb e që sot frikohen nga mafia aktuale partiake, nuk duan të flasin, as unë nuk do t’ua përmend emërat. Nuk ua përmend emërat për shkak se më kanë treguar në besë dhe unë nuk dua që të keqpërdor besimin e tyre, pavarësisht nga fakti se unë, ka kohë që nuk komunikoj me ta, pikërisht për shkak të qyqarllëkut të tyre. Dikush prej tyre një ditë do të flasë, por atëherë ka për të qenë vonë si për ata si akterë si për Kosovën të cilës e vërteta sot i duhet më shumë se buka.
E, pra, kur u pa se sistemi i diktaturës njëpartiake komuniste ra në kolaps të pashpëtueshëm, regjimi i Beogradit, për të mos lëshuar “frejt” e pushtetit dhe për t’u mos përfshirë Kosova nga një “vakuum” pushtetor në të cilin do të mund të futeshin elementë të padëshiruar dhe të paverifikuar nga garnitura e Millosheviqit, ftoi Rrahman Morinën dhe besnikët e tjerë që disa prej tyre edhe sot janë gjallë e i urdhëroi:”NË AFAT SA MË TË SHKURTËR, NGA NJERËZ TË VERIFIKUAR TË FORMONI PARTINË ME PARASHENJËN DEMOKRATIKE. NË MOMENTIN E DUHUR DO TË DILNI NË OPINION”. Rrahman Morina, ftoi besnikët dhe të bindurit e vet në Kosovë dhe kërkoi prej tyre që të vepronin në frymën e asaj që u kërkua nga ai. Për një kohë jo të gjatë u formua partia me emër të ri, LDK, por me material të vjetër të partisë së shpartalluar LKK. Në këtë parti, përveç kolonës së parë, të ish-LKK-së, hynë pothuaj të gjithë ANËTARËT TJERË TË ish-LKK-së. Të gjithë këta, bashkë me trupin në LDK sollën edhe mendjen, bindjen, frymën, zanatin, rutinën, gjeturinë dhe pashpirtësinë që kishin mësuar në shkollën titiste. Por, jo vetëm kaq, përveç pjesës më të madhe të LKK-së në LDK hynë edhe të gjithë mekanizmat dhe individët bashkëpunëtorë të sigurimit serb, të cilët edhe sot e kësaj dite mbetën të pazbuluar. Këta shpëtuan duke u maskuar brenda LDK-së dhe prandaj iu dëshmuann me devotshmëri të madhe qiftit RUGOVA-AGANI. Ata u shërbyen me afësitë e tyre organizative dhe për një kohë fare të shkurtër, me rrjetin e tyre partiak-indormativ, mbuluan krejt hapësirën e Kosovës. Populli ynë i entuziazmuar dhe i dalldisur, duke mos pasur zgjedhje tjetër, u turrën drejt në LDK. Edhe unë nga burgu ftoja, në mënyrë naive:të gjithë në LDK! Unë e kuptova dredhinë pas vitit 1992. Disa të tjerë më vonë. Disa zemërbardhë nuk e kanë kuptuar as sot dhe prandaj nuk duhet të heshtim, por ta themi të vërtetën e kulluar ndonëse e hidhur. LDK-ja tuboi rreth vetes edhe 700-800 mijë anëtarë të partisë! Në fazat e mëvonshme, në LDK hynë edhe disa kontingjente të ish të burgosurve politikë zemërbardhë, idealistë, por aty këtu edhe ndonjë karrierist. Bërthama e kamufluar titiste, me anë të agjitacionit të rafinuar, në stilin telallxhinjve, trumbetonte:”Jemi partia me numër më të madh të antarëve në Ballkan e ndoshta edhe në Evropë! Me ne po fillon demokracia dhe me ne po fillon rezistenca e lufta për lirinë e pavarësinë e Kosovës”! Këta dallaverexhinj e “tregëtarë flamujsh”, iu dhanë punës për të diskredituar të gjithë ata që shprehnin çfarëdo dyshimi dhe nuk i bindeshin qiftit RUGOVA-AGANI. Njëkohësisht, këta, në stilin titist, punonin për krijimin e KULTIT TË RUGOVËS. Këta merreshin intenzivisht me krijimin e dirigjimin e grupeve të mbledhjes së “tre përqindëshit” në Kosovë e në diasporë. Merreshin me organizimin e rrjetit të informimit të fshehtë, të përcjelljes KOMPETENTE të oponentëve e herë-herë edhe të eliminimit të ndonjërit nga “grigja” e vet nëse bëhej pengesë për rehatinë e jetën superluksoze të “krerëve” të partisë. Në këtë mënyrë, shumë shpejt arritën të futnin nën kontrollin e tyre tërë jetën politike, arsimore e kullturore në Kosovë e madje edhe në diasporë. Bukvalisht, në Kosovën e robëruar dhe në diasporën e “hipnotizuar”, shqiptarët asgjë nuk mund të bënin pa lejen dhe pa dëshirën e LDK-së. Në këtë punë kishin përkrahjen diskrete të regjimit të Millosheviqit. Këta njerëz vepronin lirisht brenda në Kosovë e jashtë në botë. UDB-ja këta nuk i pengonte, por vetëm i mbulonte. UDB-ja ndiqte dhe eliminonte qiftat e ENVER HADRIT, TË VËLLEZËRVE GËRVALLA E TË KADRI ZEKËS.
Mirëpo, ligji i jetës e ka rrjedhën e vet dhe i vetmi ky ligj është ai që, në fund të fundit, i thyen ligjet e imponuar të njerëzve.
Pas fillimit të kryengritjes në krye me UÇK-në, ky rrjet në shërbim të LDK-së pësoi disa goditje dhe prandaj shumë prej tyre nga frika e likuidimit ikën jashtë. Gjithashtu pas përfundimit të intervenimit të NATOs, nga frika e pushtetit të udhëhequr nga Qeveria Thaçi, shumë prej tyre, mbetën definitivisht jashtë ose u pasivizuan fare. Pas ardhjes së RUGOVËS përsëri në pushtet, besnikët e tij, nga një pjesë të grupeve të Tahir Zemës, formuan një rrjet të sigurimit mafioz, i cili nën mbulimin e pajtimin e RUGOVËS u zgjerua shpejt dhe u penetrua shumë shpejt pothuaj në të gjitha intitucionet kukulla të Kosovës.
Filloi përsëri jeta e çfrenuar luksoze, por tash e financuar legalisht nga buxheti i Kosovës sidhe nga prurjet e përqindjeve nga tenderët. Në Kosovë, pëshpëritej vesh më vesh se asnjë tender nuk mund të fitohet pa ndërmjetësimin e UKË IBRAHIM RUGOVËS! E, ndërmjetësimet e kësaj natyre kushtonin e kushtojnë më së paku dhjetë për qind e mund të arrijnë edhe deri në qind për qind të vlerës së përgjithshme të biznesit përkatës!
Fort i nderuari Albert, një fie histori ishte e domosdoshme për të kuptuar burimin e këtyre që po ndodhin sot dhe të atyre që do të ndodhin nesër. Përsëri ligji i jetës do të prishte idilën e jetës luksoze të atyre që bënin pallë midis varfërisë frapante të popullit të vet. Ibrahim Rugova ishte goditur nga një sëmundje e pashërueshme. Të tjerat, për ata që kanë përcjellur rrjedhat politike e shoqërore në Kosovë, dihen.
Me ardhjen e z. Fatmir Sejdiut në postin e Presidentit, planet e mafisë brenda LDK-së u ngatërruan. Edhe përpjekja për ta shtyrë z. Dacin në vendin e Rugovës dështuan. U bë e çara e madhe në LDK dhe brenda mafisë në LDK. Z. Fatmir Sejdiu prishi përbërjen e bërthamës së trashëguar nga Rugova. Largoi Ramë Marën(këshilltar për sigurim!), Berim Ramosajn(këshilltar për ekonomi!) e Sali Cacajn(këshilltar për gjithçka!) nga ekipi i vet. Mafia u alarmua tej mase. Por erdhi edhe goditja tjetër. Nga posti i Kryetarit të Kuveendit në saksi të Kosovës u rrëzua z. Daci dhe vendin e tij e zuri Kolë Berisha. Bajram Kosumi u rrëtua nga posti i kryeministrit dhe vendin e tij e zuri gjen. Agim Çeku. Adem Slihu u rrëzua nga vendi i zëvendësministrit dhe vendin e tij e zuri Lutfi Haziri. Në media dhe në popull filluan të qarkullonin fjalë për shkarkimin edhe të atyre ministrave të cilët ishin spikatur në kundërshtimin e vendosjes së z. Fatmir Sejdiu në postin e Presidentit dhe në kundërshtimin e rrëzimit të z. Dacit nga posti i Kryatarit të Kuvendit dhe të Adem Salihajt nga posti i z/kryeministrit. Kjo ishte tepër për mafinë, prandaj ajo kërcënoi seriozisht:nëse do të ndodhte që ata të shkarkoheshin, ata nuk do të hezitonin që të shkatërronin edhe degët e partisë prej nga kishin ardhur dhe do ta përçanin krejt partinë. Pushteti është i ëmbël. E dinë vetëm ata që e kanë provuar. Kur u bind LDK-ja se mafia e saj e kishte seriozisht – FRENOI! Por, kur u bind edhe Ramush Haradinaj, Kryetari i AAK-së se LDK-ja nuk po i jepte ministrat e vet edhe ai i mori në mbrojtje ministrat e vet. Gjen. Kryeministri Çeku, nga “MARSHI” u kthye në pozicionin “QETËSOU”!
Mirëpo, në ushtri ka “qetësou”, por në politikë dhe në luftën për pushtet s’ka qetësou. Ai që ndalet, bie! Kështuqë vazhduan “vlimet” në LDK, vazhduan “vlimet” në PDK, vazhduan “vlimet” në AAK dhe po vazhdojnë “vlimet” në krejt Kosovën.
Në LDK ka për të ardhur deri te çthurja më përpara, sepse më përpara edhe u “kristalizuan” dy pole. Poli i ashtuquajtur i “lëdëkëistëve” dhe poli i ashtuquajtur i “rugovistëve”. Cilët, vallë, janë këta që i thonë vetes lëdëkëistë? KËTA JANË ATA QË DUKE U PËRGJËRUAR NË KOKËN E RUGOVËS HISTORIK, DUAN TA VAZHDOJNË POLITIKËN E TYRE TË ZEFKUT, DUKE IU KTHYER “INSTITUCIONEVE” QËMOTI TË “FJETURA” E TË “NDRYSHKURA” TË PARTISË! KËTA JANË “INSTITUCIONALISTËT”! Po, “rugovistët”, vallë, cilët janë? KËTA JANË ATA QË DUAN TA GJEJNË “RUGOVËN E RI” DHE QË DUAN TA VAZHDOJNË POLITIKËN E VJETËR TË RUGOVËS SË NDJERË, DMTH PA NJOHUR AS INSTITUCIONET E PARTISË, AS INSTITUCIONET E KOSOVËS! TË DYJA PALËT JANË IMPROVIZUES, QË DËGJOJNË KËSHILLAT E QENDRAVE TË MËDHA E TË VOGLA TË INTERESIT DHE QË MBËSHTETEN NË MAFINË KOMBËTARE E NDËRKOMBËTARE! Të parët janë “ELEFANDËT E MOÇËM”, kurse të dytët janë “TIGRAT E RI”!
Zotëri NASER RUGOVA, në bazë të shkrimeve e intervistave që pata rastin t’i lexoja këto ditë, len mbresën e një burri shumë të rafinuar, shumë të zgjuar e shumë demokrat, por që ka PROBLEME LIDHUR ME VLERËSIMIN E SAKTË TË INDIVIDËVE E LIDHUR ME ORIENTIMIN NË HAPËSIRË-KOHË! Ky VEPRON jashtë institucioneve. Një organizatë të cilën ai udhëheq len përshtypjen e një organizate gjithmonë të re dhe krejt të padjallëzi. “REFORMA”!
Lexoni se çfarë shkruan “RUGOVA I RI”: Projekti “Reforma” që është përpjekja e vazhdueshme për një LDK moderne, të fortë dhe unike, nuk është projekt që do të ndalet me Kuvendin e ardhshëm zgjedhor të LDK-së, por është një proces që do të vazhdojë edhe në vitet e ardhshme, sepse “Reforma” paraqet BOSHTIN e fuqisë së LDK-së, intelektualët e rinj që e presin të nesërmen duke punuar në të tashmen.(rugova.net)”. Edhe kjo në kllapa që shihni në fund të citatit janë dy fjalë, por që lënë shumë të nënkuptohet. “Rugova i ri” edhe me kaq ka treguar shumë. “Reforma” të cilën ai përfaqëson e promovon, mëton të jetë boshti, thënë pak më popullorçe, MULLARI i LDK-së! Nuk e di nëse “ELEFANDAT E MOÇËM” DO TË PAJTOHEN QË TË SILLEN “RRETH MULLARIT TË TIGRAVE TË RINJ”? Tash për tash “ELEFANDAT E MOÇËM”, nismës së “RUGOVËS SË RI” i kanë dhënë një përgjigje fort të ashpër dhe shumë përjashtuese. Mirëpo në politikë asgjë nuk mund të përjashtohet. Shkatërrimet, përçarjet, e kalbjet mund të shkaktohen nga jashtë, por gjithmonë vijnë e zhvillohen nga brenda. Ligji i jetës thotë se në gërmadhat e së vjetrës lind e reja. Për “lëdëkëizmin” dihet se nuk është asgjë e re, por vallë, a mund të jetë “rugovizmi” me “Rugovën e ri” diçka e re për Kosovën?

IZET GJAKJA:Si i komentoni shpejtimet e “fintat” rreth hartimit të KUSHTETUTËS SË KOSOVËS?

A.D.- Ngutjet e “fintat” flasin për një joseriozitet dhe janë përpjekje për monopolizim të veprimeve dhe të pozicionimeve. Kushtetutën si një KONTRATË kombëtare e qytetare duhet ta hartojnë ekspertë-konstitucionalistë që janë jashtë ndikimeve partiake e ideologjike. Për fat, në Kosovë ka të tillë. Në fund, KUSHTETUTA nuk është dhe nuk duhet të jetë dokument që hartohet e shkruhet njëqind herë. Pasi që të shkruhet KUSHTETUTA duhet t’i qëndrojë kohës gjatë e gjatë. Shikoni se si edhe vetë BASHKIMI EVROPIAN KA PROBLEME ME KUSHTETUTËN E VET. Ai që ngutet dihet se çfarë ndodhë me të, por edhe me atë që vonohet dihet se çfarë ndodhë. Prandaj, as të ngutemi, as të vonohemi! Mirëpo kjo është kulmi i urtisë! Vallë, a e kemi ne atë?

AFËRDITA KODRA:Çfarë mendoni, a do të dihet ndonjëherë e vërteta e saktë se kush është ndër ne doktor i vërtetë shkencash dhe kush është doktor me “bateri”?

A.D.- Dihet edhe tash, mirëpo njerëzit hezitojnë të flasin sepse duan të kalojnë “pa therrë në këmbë”! E dinë kolegët për njëri tjetrin, por ec e fol, kur doktorrë shkencash me “bateri” ka më shumë se doktorrë të vërtetë. Kanë doktorruar njerëzit për tema e teza të kota saqë u vjen turp edhe të tregojnë doktorrantuarat e veta. Disa kanë vjedhur komplet, disa përgjysëm, disa pjesërisht! Disa kanë vjedhur nga autorë rusë, nga autorë kroatë, nga autorë francezë. Nganjëherë qëllon që edhe zbulohen, por “institucionet” nuk reagojnë fare, sepse zakonisht edhe ato janë në duart e doktorrëve me “bateri”! Por, për sistemin tonë të arsimimit në përgjithësi ka shumë çka të flitet. Një nga projektet bazë të pushtuesve tanë, PËR SHKATËRRIMIN TONË ka qenë edhe “prodhimi” i ekspertëve e profesionistëve INVALIDË, NGA NIVELET E ULTA E DERI TE NIVELET MË TË LARTA. Kjo shihet e ndihet kahdo që të kthehesh e çkado që të prekësh. Por ligji i jetës do t’i drejtojë e do t’i pastrojë të gjithë e të gjitha.